Calfar pas son lotjament, sautar un repais, renonciar a de vacanças... Un europèu sus quatre declara de se trobar en situacion precària, çò analisa Le secours populaire français. A causa d’una “situacion financièra dificila”, lo 62% dels europèus an ja reduch lors desplaçaments e lo 47% an renonciat a calfar lor lotjament malgrat lo freg, segon aquel estudi realizat per l’institut Ipsos al près de 6000 personas, annadas de 18 ans e mai, originàrias de sièis païses europèus (Alemanha, França, Grècia, Itàlia, Polonha e Reialme Unit). Aital, s’apren que lo 51% dels grècs s’estiman fragilizats, contra lo 24% dels franceses e lo 18% dels alemands. Dins lo detalh, es arribat al 29% d’aquel total de personas de se forçar de sautar un repais mentre qu’avián fam.
 
 
Inflacion e crisi energetica
 
“Amb l’auça sobda dels prèses, la crisi energetica e las consequéncias de la guèrra en Ucraïna, per fòrça europèus las condicions de vida se son deterioradas en 2022”, çò soslinha lo Socors Popular, que jutja qu’aquela “situacion es encara mai dura que las doas annadas ont los nivèls de vida foguèron impactats pel tust de la crisi sanitària”.
 
Las familhas son sustot tocadas: gaireben un parent sus dos a ja renonciat a far partir sos enfants en vacanças o a l’inscriure a una activitat extrascolara, e lo 33% d’eles afirman que son pas totjorn en capacitat de balhar a lor mainatge una alimentacion variada.