Un navèra publicacion qui pertòca essenciaument Vasadés. Mes pro de gents, en Gasconha com dens los autes parçans occitans, i arretroberàn un reclam de la lor enfança.
Din, dan! Din, dan! La clocheta de Linhan… L’ahromic me nhaca lo pè…. Quan lo mèrle sauta au prat…Lo tambor que ditz o cantas bracas de Carnavau o de Nadau. Tostemps valent e productiu, Patric Lavaud (o La Vau s’arrespèctan lo sens exact deu son patronim com ic hè dens cèrtas de las soas publicacions o documentaris) a hargat un recuelh de 33 comptinas occitanas (coeditat per Confluences e Las Nuèits Atipicas). Acompanhadas d’un CD, qu’es au totau un quarantenat de cançons de brèç (breçairòlas, adromideras) deu genre Som, som, vene, vene, vene…, de comptinas, de formuletas enfantinas, de cançonetas sovent fondadas – causa classica – sus las repeticion e los encadenaments. Aqueth petit cabau es tirat en màger partida de la tradicion orau deu nòrd de Gasconha (Vasadés, Medoc especiaument). Evidentament, ne trobarem de semblablas, dab petitas variantas, dens tots los País d’Òc e quitament mei luenh suu planeta…
Que sabem que lo Patric Lavaud, en mei de las soas responsabilitats, n’i a guaire, au hestenau de Las Nuèits Atipicas de Lengon …e de la soa contrada, a hèit pro de collectatges en Medoc e Lanas de Gasconha[1] . Qu’a tanben rodat , dempuish ua dotzena d’annadas, mei d’un vintenat de documentaris en lenga nòsta (sostitolats en francés). Ua òbra que cau saludar pr’amor qu’a recuelhut testimoniatges de gents “umilas” (païsans, gemèirs de las Lanas de Gasconha d’autes còps…) com de personalitats de la creacion occitana mei coneishudas: Micheu Chapduelh, Eric Fraj, Miquèu Baris….
Aqueras Comptinas, illustradas per lo grafista Jérôme Charbonnier, que son un bèth mejan per iniciar gojats e mainadinas a l’occitan de Gasconha. Ua ocasion tanben peus pairans d’arretrobar formuletas o mimologismes a còps oblidats dempuish l’enfança.
Joan-Jacmes Fénié
[1] Dens Jornalet, véder L’acordeon dens las Lanas de Gasconha (19.7.2014) e A l’escota deu Medoc (7.4.2012)
 | LAVAUD, Patrick (illustracions de CHARBONNIER, Jérôme). Comptinas. Edicions Confluences, 2022. 48 paginas. 20 èuros. |
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Patric La Vau fa de bon trabalh amb un grand professionalisme. En mai de l'interés del contengut de las òbras que propausa, dona tota sa dignitat a la creacion en occitan. Mercé a el.
#1
D'aqui que las comptinas comptan e contan pas.
Un pesolh, dos pesolhs tres pesolhs es tu qu'aniràs clucar !
Perdeque « c̶o̶m̶p̶t̶i̶n̶a̶s » (de comptar) e pas « continas » (de contar) coma sobre l'imatge ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari