Fins en decembre de 2011, lo neerlandés Arnoud van Doorn èra lo vicepresident e lo conselhièr a L’Aia del Partit de la Libertat, dirigit pel xenofòb e antimusulman Geert Wilders, en tot èsser un dels sieus conselhièrs mai prèps. Malgrat una trajectòria politica ligada a una formacion que lucha contra l’immigracion, contra l’èuro, contra l’Union Europèa e contra l’islam, Van Doorn estonèt totes a fin de febrièr, quand anoncièt sus Twitter la siá conversion a la fe musulmana.

Lo conselhièr, que quitèt lo Partit de la Libertat principalament perque se i acceptava pas de criticas ni de questions, comencèt d’estudiar l’Alcoran “per curiositat”, e pauc de temps puèi, se convenquèt que s’agissiá d’una religion “polida e sabenta”. En qualques entrevistas amb de mèdias coma Al Jazira e El Mundo, reconeguèt qu’una de las errors de la siá vida èra d’aver fach partida d’un movement politic que criminaliza l’islam, e “non los musulmans coma tals”.
 
Lo 27 de febrièr, sul compte de Twitter, escriguèt en arabi: “Fau testimoniatge que i a pas d’autre dieu que Dieu e que Maomet n’es lo messatgièr”. Pauc après apondèt en neerlandés: “Nòu començament”.