Lo primièr ministre de Tuvalu, Kausea Natano, a mandat una letra dobèrta a la 27a cima del clima de las Nacions Unidas (COP27) qu’es a se debanar en Egipte, en avertissent del fach que lo cambiament climatic es a negar las illas del Pacific, e demanda als dirigents del Mond de jónher lo tractat de non-proliferacion dels combustibles fossils, pr’amor que la dependéncia dels umans al petròli, al gas e al carbon menaça lors tèrras d’una submersion definitiva. La demanda, Nagano la fa amb lo sosten d’una centena de laureats del Prèmi Nobel, de milièrs de scientifics e de la societat civila, car totòm pòt signar la letra sul sit d’Avaaz.org.
 
Arunan, lo ministre dels afars estrangièrs de Tuvalu, Simon Kofe, faguèt son intervencion vidèo dins la COP26 dins la mar, l’aiga fins als genolhs, per avisar en imatge del risc que la pojada de nivèl de la mar pòsca negar de païses entièrs, coma lo sieu. Las illas Tuvalu son un archipèla de l’ocean Pacific que compta 11 792 abitants.