Del 14 al 18 de novembre, l’Institut d’Estudis Occitans d’Aude organiza una Setmana de la Paraula d’Òc amb quatre rendètz-vos
Anna-Clara Cazalet e Murièl Batbie, en recital lo 16 de novembre a Puègnautièr
Del 14 al 18 de novembre, l’Institut d’Estudis Occitans d’Aude organiza una Setmana de la Paraula d’Òc amb quatre rendètz-vos; una paraula jos las fòrmas diferentas del conte, de la conferéncia, del cant e del teatre.
Los primièrs tres rendètz-vos se tendràn a Puègnautièr, al teatre Na Loba (rendètz-vos a 18h30).
Dobertura, lo diluns 14 de novembre, amb los racontes del pairòl badinaire per Fabian Bages: “Se ditz que las mai bonas sopas se fan dins un vièlh topin! Los contes e racontes de mon pairòl badinaire mitonan dempuèi lo temps que la vièlha Marta fialava la lana blanca. Son d’istòrias plan relevadas, pebradas, aprestadas d’umor amb un bricon de filosofia. Se las cal tastar e congostar delicadament, coma un gòt de vin vièlh se parteja entre amics, dins la doça claror d’una nuèit d’estiu de la Sant Martin...”
L’endeman, dimars 15, Joan Claudi Forêt e Bruno Cecilhon presentaràn lo teatre de Max Roqueta. L’escrivan a daissat 16 tèxtes de pèças, mas totas son pas estadas montadas e per las que o foguèron siguèt pas totjorn en occitan ! L’intervencion de l’universitari e las lecturas del comedian permetràn de ne saupre mai sus aquela òbra teatrala ont se mesclan farcejadas e satiras sus fons permanent de poesia.
Plaça a la cançon lo dimècres 16 amb lo recital Per totes los camins de Murièl Batbie-Castell, acompanhada per l’arpista Anna-Clara Cazalet. Aquel recital poetic se fa en 6 lengas de França (alsacian, basco, breton, catalan, còrs e occitan). L’artista prepausa un percors exigent, proesa vocala e lingüistica a l’encòp, amb alternància dels cants a cappella o acompanhats amb la guitarra, e las lecturas, lo tot menat coma un raconte de viatge.
Lo quatren rendètz-vos de la setmana se debanarà a l’Ostal de las Memòrias (sala del GARAE) de Carcassona lo divendres 18 de novembre (18h). Josiana Ubaud presentarà los escaisses collectius per designar los estatjants de las comunas, en metent endavant d’exemples preses en Lengadòc e en Provença.
Lo bicentenari de la naissença d’Aquiles Mir
Lo felibre Aquiles Mir nasquèt lo dissabte 30 de novembre de 1822 dins la comuna d’Escalas. Aquela data serà marcada per mai d’un rendètz-vos a l’iniciativa de l’IEO Aude:
— lo dimenge 20 de novembre, a Ladèrn de Lauquet (17h), se legirà de tròces de la bofonada del felibre Lo lutrin de Ladèrn e lo grop vocal e polifonic GEPPE encadenarà amb de cants tradicionals occitans.
— lo dijòus 24 (17h30, a l’ostal del Barri de la Barbacana a Carcassona) e lo dissabte 26 (18h, comuna d’Escalas), Alan Roch balharà una conferéncia sul vin e la vinha dins l’òbra de Mir.
— lo dimenge 27, al teatre Aquiles Mir de Cucunhan (17h), Claudi Alranq presentarà lo Sermon del Curat de Cucunhan dins la version del felibre audenc.
— Ràdio Lenga d’Òc-Aude prepausarà una cronica quotidiana del 15 al 30 de novembre entitolada Suls talons d’Aquiles.Doas emissions Als 4 Vents d’RCF-Pays d’Aude (21 e 28 de novembre) seràn consacradas al poèma La vinha que marquèt l’engatjament d’Aquiles Mir dins la literatura d’òc.
E es pas lo tot…
A aquestes rendètz-vos de novembre, farà seguida una setmana d’animacion a Saissac en Montanha Negra, lo Saissac d’Òc del diluns 28 de novembre al dissabte 3 de decembre que se clavarà amb un balèti menat per Trad’Alam, lo dissabte de ser.
Plaça a la literatura orala apuèi amb doas projeccions del filme Sus las traças d’En Pierròt en preséncia del realizaire Patric La Vau:
— lo dimècres 7 de decembre, a Montlaur en Corbièras (amb demai lo filme François Moncla, passaire d’umanitat)
— lo dimècres 8 de decembre (18h) al GARAE a Carcassona.
Doas pèças pel jove public seràn l’objècte d’una creacion:
— lo divendres 2 de decembre, la Fabrica Salvatja acabarà una residéncia a Concas d’Orbièl per preparar la pèça novèla L’ Ors als escolans del vilatge.
— lo dijòus 16, de vèspre, a l’anciana comuna de Carcassona, Gèli Buonomo e Delfina Sire presentaràn Minòt, adaptacion en occitan d’una pèça en francés de Fabien Arca: Moustique.Per ensajar de respondre a de questions coma: “Ont sèm quora sèm pas nascuts?” “Perqué la sòrre de Minòt a un «pichòt» amic mai «grand» qu’ela?” “Es que Minòt se pòt maridar amb Nicolau?” “Cossí far per ésser «Circ»?” “La lenga mairala, òc, mas qu’es aquò; la lenga pairala?”.
Puèi, vendrà lo temps de celebrar Nadal (concèrt del trio Nadalenc -Sòfia Jacques Serrano, Aimat Brees e Manu Théron- lo dimècres 14 de decembre a Puègnautièr) e l’an novèl.
Leon Castèl
Fotografias:
Lo felibre Aquiles Mir (1822-1901)
Lo félibre Aquiles Mir (1822-1901)
Etiquetas
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Comentaris
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari