Dissabte passat, s’inaugurèt lo pont levadís de Bordèu que connècta los quartièrs de Bacalan e de La Bastida. Tre uèi es dobèrt a la circulacion.
Aquel pont levadís, lo mai grand d’Euròpa, es un trabalh monumental que marca l’intrada del Pòrt de la Luna, entre lo Pont d’Aquitània e lo Pont de Pèira. Be serà una granda comoditat pels bordaleses, mai que mai per aqueles que travèrsan cada jorn Garona. Lo pont a quatre pilons de 77 mètres de naut e a costat 156 milions d’èuros.
Lo pont es plaçat integralament sul territòri de la comuna de Bordèu e lo conselh municipal l’a nomenat Pont Jaume Chaban-Delmàs [pont Jacques Chaban-Delmas], en omenatge a l’òme politic bordalés que, atanben, foguèt parisenc e participèt al soslevament de París contra l’ocupacion nazi. Al delà d’èsser estat primièr ministre de França e candidat neogaullista a la presidéncia de la Republica, Chaban-Delmàs foguèt deputat radical pel departament de Gironda e cònsol de Bordèu entre 1947 e 1995.
La veusa de Chaban-Delmàs acompanhèt las autoritats, localas e estatalas, a la fèsta d’inauguracion del pontàs, dissabte passat.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Encara Chavan del Mas, es piri qu'Atatürk a Ankara... A quan lo jorn que los Bordalés emprontaràn l'avenguda Chavan del Mas, traucaràn lo baloard Chavan del Mas (anueit baloard Wilson), viraràn alentorn de la plaça Chavan del Mas sus laquau serà en mestrasia la font Chavan del Mas, passaràn davant l'estadi Chavan del Mas avan de posquer causir : sigue de cap a l'estacion de trin Chavan del Mas (anueit gara St-Joan) o de cap a l'aeropòrt internacionau Chavan del Mas (anueit Bordèu-Merinhac)per lo square Chavan del Mas, au ras de la piscina Chavan del Mas, a costat de l'estadi Chavan del Mas.
Un monde ideau, qué.
Quora perpausèrem de balhar los noms de personalitats occitanas, seriosas e vertadeirament importantas de Bordèu (pont Alienòr d'Aquitània, aeropòrt internacionau Guilhèm IX d'Aquitània, Pèir Berland, Arnaud Miquèu, Joan-Antòni Verdièr, Edoard Bourciez...) lo silenci estut talament trencadís que nos credurem enshordir...
#1 As plan rason de metre lo det sus çò qu'impòrta. Aquò del pont mai larg, de l'edifici mai naut se torna en:
-Que ieu ai lo pont mai long d'Euròpa!
-Que ieu pissi mai luènh que tu !
Pel pont de Milhau es parièr. Me sembla polit mas çò mei important es que facilita lo pas d'un costat a l'autre de Tarn.
Que vesoi los imatges d'aqueth pont levadís a la television au jornau de dissabte ser. Be sembla lèd totun ... mès que permeterà sustot aus Bordalés de miélher circular en veitura. Çò d'essenciau qu'ei aquiu !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari