Lo missil tombat dimars de ser en territòri polonés vendriá de la defensa antiaeriana d’Ucraïna, çò diguèt ièr lo secretari general de l’OTAN, Jens Stoltenberg. Totun, apondèt que l’enquista èra totjorn dobèrta. A mai, Stoltenberg precisèt que la responsabilitat èra russa pr’amor que contunha de far una “guèrra illegala” contra Ucraïna.  De son latz, lo president de Polonha, Andrzej Duda, considèra que l’incident es una “malvenguda” per la quala moriguèron dos ciutadans poloneses.
 
Ier dimècres, se tenguèt una reünion d’urgéncia de totes los ambaissadors dels estats membres de l’OTAN per analisar la situacion del temps que l’armada de Polonha se trobava en alèrta maximala. Un milièr de policièrs son sus plaça per enquistar sus l’incident.
 
La fusada tombèt près de la vila de Przewodów, près de la frontièra de Polonha amb Ucraïna, e avièt totas las alarmas se per cas èra una agression russa. De fach, d’analistas consultats per la redaccion considèran qu’un atac rus sul territòri polonés seriá una plan probabla estrategia del Kremlin per analisar la velocitat e l’unitat de responsa de l’OTAN.