Los canadians zo fagueren en 2012: lo collegi daus medecins de familha de l’Ontario recomandava au public de redusir son exposicion aus pesticidas. Auei, son los dau Lemosin que se mobilizan: 85 an signat una peticion per que siá redusida de 50% lor utilizacion d’aicí a 2020. Per Pierre-Michel Périnaud, medecin generalista a Limòtges a l’origina de quela peticion, “mai d’un sinhau son au roge: daus sinhaus que concernan certans cancers, emb certans produchs, per los agricultors coma per los ribairòus”. Nos rapela que daus estudis “mostran que la malaudiá de Parkinson aumenta en foncion de vòstra exposicion a un o mai d’un pesticida”  e “que lo nenet nais emb desjà 200 produchs chimics qu’an impregnat lo liquid amniotic de sa mamà”. Per se, avem pas mestier d’esperar mai d’estudis per agir e “prene de las precaucions e sostener una alternativa au modele agricòla actuau”.
 
Lo Lemosin es una region ente la pomocultura es plan importanta per l’economia locala. La filiera que patiguet dau giau en 2012 mai de la sechiera en 2011 es plan sostenuda per las autoritats localas. Mas la famosa poma Golden, protegida per una apelacion d’origina, es una especia pas adaptada au climat locau que necessita a pus pres 40 tractaments. L’utilizacion daus pesticidas pausa un vertadier problema sanitari que de las associacions denóncian despuei de las annadas. La quita Eva Joly, candidata ecologista a l’eleccion presidenciala de 2012, era vengua a Alaçac (País de Briva), per las rescontrar. L’iniciativa de quilhs medecins podriá menar la region a un debat sus son avenidor economic.




Maime Caillon