En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas l’entrevista de Joan-Pèire Laval, que presenta la mobilizacion de dimècres que ven a Tolosa e Montpelhièr per l’occitan a la television. Lo Collectiu Occitan a decidit de tornar far campanha per “l’occitan cada jorn a la television regionala” amb aqueles aperitius revendicatius a 12h davant los sits de France 3 a Montpelhièr e Tolosa.

Fa longtemps que l’esperavan. A la basa, èra en 2019 que lo Collectiu occitan (compausat de 12 associacions occitanistas) voliá organizar de manifestacions davant los sètis regionals de France 3 per reclamar mai d’occitan a la television. Manca d’astre: la marrana de COVID es passada per aquí. Lo 23 de novembre a 12h, dos aperitius revendicatius se tendràn davant los sètis de France 3 a Montpelhièr e Tolosa. Quinas son las revendicacions del collectiu? An evolucionat dempuèi tres ans? Mai d’explicas amb Joan-Pèire Laval, pòrtavotz del collectiu.