Los Blaus son pas mai campions del Mond
 
Divendres, se jogava la finala del 13-cadieral entre França e Anglatèrra. La partida tenguèt totas sas promessas al nivèl de l’engatjament. Los Blaus menavan a la pausa 14-12, mas se fasián susprene a doas minutas del tèrme e perdián lor corona: 24-28.
 
 
Passejada de santat per las australianas
 
Dissabte, lo vèspre a Old Trafford començava amb l’oposicion entre las Jillaroos australianas e las Kiwi Ferns neozelandesas. Dins la partida de pola, las Negras avián plegat 8-10, mas la finala se debanèt pas sul meteis esquèma. Las australianas menavan 20-0 a la pausa e amplificavan puèi lor avantage per servar lor incontestabla supremacia mondiala: 54-4.
 
 
Festenal ofensiu dels Cangorós
 
La comunautat samoana mondiala aviá fait part de son sosten a l’esquipa nacionala en somiant de crear una suspresa de las bèlas.
 
Los samoans foguèron valents, mas aquò sufís pas fàcia als talentuoses australians. Lo Siva Tau (cant de guèrra samoan) impressionèt pas los cangorós. Los samoans dominan la debuta de la partida, mas plegan sus una accion de 80 mètres e un ensag de Latrell Mitchell. L’alièr Josh Addo-Carr, escaissat “la Mandra”, ven traucar al còr del terren: James Tedesco al relèu marca. Liam Martin ajusta un ensag e los Verd e Aur menan 14-0 a la pausa.
 
Un còp de coide dins lo morre val un carton jaune a Angus Crichton, mas, en inferioritat numerica, los australians tornan marcar (20-0). Un reversament d’ataca permet a Brian To’o de dobrir la marca pels samoans. Tedesco punta un segond ensag; pels samoans, lo centre Crichton i va de son ensag aprèp intercepcion. Sus la còrna, Latrell Mitchell clava la victòria australiana sus la marca de 30-10.
 
Las 3 esquipas campionas del Mond se recampan al mitan de la pelena. Rendètz-vos en França dins 3 ans, en 2025. Mentretant, se fa la promessa d’un novèl desvolopament de las relacions internacionalas entre los dos emisfèris.
 
Per ara, la federacion francesa e los angleses an anonciat de rescontres entre las formacions nacionalas femeninas e masculinas per la fin d’abril a Warrington.
 
 
Quand lo burro se fa dragon
 
Aquesta fin de setmana, se tendrà la setena jornada del campionat d’Elèit 1. Lo campion Carcassona reçauprà dimenge a Domèc una formacion pianenca que ven de far signar quatre jogaires non retenguts pels Dragons Catalans: l’internacional francés Benjamin Jullien, lo centre internacional neozelandés Dean Whare, los joves Florian Vailhen e Hugo Salabio e tanben Josèp Paulo del Tolosa Olimpic. De qué téner la rota en Elèit 1!
 
Tanben al programa d’aquesta setena jornada, las partidas: Albi-Avinhon, Lesinhan-Vilanòva, St Gaudenç-Limós e Tolosa-Dragonets.
 
Sus totes los terrens, coma se ditz en samoan: Tau e matua tau! Fai ia mafai! (Lucha d’a fons ! O cal balhar tot!).
 
 
 
 
Alan Roch