La reünion de Serbia e Kosova de diluns passat a mal capitat e s’es pas trobat una solucion a la crisi del mes d’agost a prepaus de las placas d’immatriculacion e dels documents exigits per traversar las frontièras. Dins una reünion dins l’encastre del dialòg facilitat per l'Union Europèa, lo president sèrbe, Aleksandar Vučić, e lo primièr ministre de Kosova, Albin Kurti, cercavan de trobar una sortida a la tension, mas lo naut representant de l'UE, Josep Borrell, precisa après d’oras de reünion que i a pas agut cap d’acòrdi.
 
Davant l'abséncia de pache lo meteis jorn que s'acabava lo tèrme donat per Kosova per enebir las placas d’immatriculacion sèrbas, Borrell soslinha que s’aprendriá als dos dirigents se se produsiá una escalada de violéncia.
 
La tension comencèt al començament d’agost quand la polícia kosovara aguèt declarat d’èsser la buta de còps de fuòc a la frontièra nòrd del país, ont de barricadas s’èran erigidas sus de rotas devèrs Serbia per protestar contra la nòva politica frontalièra del govèrn. A causa de las tensions e après consultar los ambaissadors de l’UE e dels Estats Units, Prishtina aviá reportat d’un mes l’intrada en vigor de las nòvas règlas a la frontièra sèrba. Semblava qu’a la fin d’agost i aviá una volontat d’acòrdi entre los dos païses.