Ena escadença deth Dia internacionau entara eliminacion dera violéncia contra es hemnes, era cantadora aranesa Alidé Sans presente aué eth sòn darrèr single basat en dues cançons dera tradicion orau occitana “que mòstren er enòrme pes dera maquina patriarcau qu’encara portam dessús”.
 
Damb aguesta publicacion, Alidé Sans mèrque eth començament dera perspectiva artistica que seguiràn d’ara tà deuant es sòns trabalhs, en tot centrar-se ena arraïtz dera cultura populara e ena informacion que mos apòrte sus er imaginari collectiu a on s’a bastit era nòsta societat tot en tot jogar-i “descaradament”. Ei atau qu’Alidé Sans pren aguesta tradicion orau; damb era intencion “d’actualizar-la, reïnterpretar-la, tresvirar-la, qüestionar-la, reïnventar-la, trincar-la, distorsionar-la, discutir-la, subvertir-la, desafiar-la, afrontar-la”.... “Ath temps que celebram era vida e construïm eth nòste pròpri discors, descaradament, cantant, dançant, hènt er amor, damb era fòrça imparabla dera alegria dissidenta". 
 
Es cançons
 
Es dues cançons escuelhudes tath single son “Passat deman” e “Èran tres fraires” que testimonien un maridatge forçat e ua sagnanta violéncia masclista. Conscienta que non mos cau carar deuant d’aguesta impunitat damb era que constantament se viòlen drets umans e entà combàter aguest silenci e aguesta distància que mos hè mau, Alidé Sans da era man a totes es companhes, sòcies, fraies, amigues, camarades e païsanes d’arreu deth mon que l’escoten, la comprenen, la cren e li dan era man. “Se sabem qu'amassa èm mès fòrtes e qu’auem eth gran poder de generar un impacte de cambiament, era qüestion ei: qué demoram?”, ce afirme era cantadora aranesa.
 
“Passat deman” ei ua borrèia tradicionau que popularizèc eth grop Cap Negre er an 1999, e “Èran tres fraires” ei ua cançon populara de Roergue: la popularizèc era cantadora Maria Roanet en 1977.
 
 
Dètz ans d’Esperança
 
Alidé Sans comencèc a hèr publica era sua carrèra artistica hè justaments 10 ans, eth 25 de noveme de 2012, damb era publicacion deth videoclip “Esperança”,  a on diuèrsi artistes dera Val d’Aran cantauen contra era violéncia de genre.
 
Era societat aranesa ère esmoguda per assassinat en Vielha de Sabrina Cortés, ua hemna de 32 ans e mair d’ua hilha de 2, a mans deth sòn marit eth madeish dia qu’auien d’anar tà signar eth divòrci.
 
 
 
 
FM