Lo dijòus 10 de novembre de 2022, partiguèrem a pè de l’escòla cap a Ciutat per participar a un talhièr nomenat “Lo percors del chivalièr”.
 
Aquel talhièr èra prepausat per l’Ofici del Torisme e menat per doas personas encostumadas: lo chivalièr Gwen, darrièr chivalièr de Carcassona e la chivalièra Eleonòra, responsabla de la formacion dels futurs chivalièrs.
 
Un còp arribats a lor local, lo chivalièr Gwen nos presentèt l’evolucion de las espadas dins lo temps, en començant pel glasi roman, puèi la protoespada per acabar per la bastarda, que se deviá téner a una man e mièja de tant qu’èra pesuga.
 
Nos ensenhèt puèi las diferentas partidas d’una espada, coma la partida fòrta (lo bas de la lama, mai larg), la partida febla (la punta mai fina), la gotièra, la punhada, lo pomèl e la garda (plan utila per gardar sos dets).
 
Nos expliquèt puèi que sols los filhs de senhors podián venir chivalièrs, mas que lor caliá seguir una formacion plan particulara. A sèt ans, lo dròlle quitava sa familha per dintrar al servici d’un chivalièr en tan que page, un pauc coma un servicial. Mai tard, passava escudièr. Aviá a sa carga l’entreten del caval e de las armas de son senhor.
 
Per poder passar chivalièr, caliá respectar las tres valors màgers: l’onestetat (jamai mentir), la leialtat (demorar fidèl a son senhor e a sa paraula) e l’onor (defendre los mai febles e combatre l’injustícia). Se l’escudièr respondiá a aqueles critèris, podiá reçaupre l’adobament, una ceremònia oficiala de batejada del chivalièr.
 
Dins un segond temps, la chivalièra Eleonòra nos encaminèt cap a las dovas del Castèl Comtal per nos entraïnar al combat a l’espada. Nos ensenhèt cossí parar un còp portat per dessús o pel costat. Nos metèrem puèi per grops de dos per nos afrontar amb d’espadas de mofa. Eleonòra se veniá de còps interpausar dins los duals.
 
Aquel entraïnament s’acabèt per la ceremònia de l’adobament, ont cadun, aprèp la formula consacrada “Per Sant Dànis e per Sant Jòrdi, ieu, chivalièr Gwen, fau de tu un chivalièr o una chivalièra”. Nos fasiá puèi levar e aprèp una tapa simbolica, èra fait, èrem chivalièrs!
 
Foguèt una brava tantossada, que a mai, foguèt filmada per França 3, per passar dins l’emission “Metèo a la carta”. 
 
Nos sèm vertadièrament regalats!
 
 
 
 
Tèxt escrit per la classa
 
 
 

 



 
 

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…