En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas l’entrevista de Joan-Francés Laffont, president de Convergéncia Occitana, una de las associacions que fan partida del Collectiu Occitan que manifestèt dimècres passat per l’occitan a la television publica. Laffont fasiá partida de la delegacion que parlèt amb la directritz de France 3 Occitanie, Rose Paolacci, dins la qual la cadena s’engatgèt a aumentar la preséncia de l’occitan dins la cadena, coma o raportàvem ièr sus Jornalet.

Lo 23 de novembre a miègjorn, de militants occitanistas del Collectiu Occitan plantèron lo tibanèl per far un aperitiu reivindicatiu al 24, Camin de la Cepièra… Una adreiça que coneissèm plan, puèi qu’es la de l’antena regionala de France 3 Occitanie a Tolosa. Que revendicavan? Una mai granda preséncia de l’occitan a l’antena de la television publica pel biais de programas quotidians. Demest los participants a aquel aperitiu, trobam lo president de Convergéncia Occitana, Joan-Francés Laffont.