capçalera campanha

Actualitats

PoliticaSocietat

La fòrta oposicion obliga de retirar la proposicion d’abolir la corrida a l’Assemblada Nacionala francesa

Se deviá debatre dijòus passat mas la fòrta oposicion a l’iniciativa del deputat Aymeric Caron lo forcèt de retirar la proposicion de lei

| Stephane Mouchmouche/Hans Lucas/AFP

Tèxte legit

Dijòus passat, l’Assemblada Nacionala francesa deviá debatre una proposicion de lei per abolir la corrida. Ça que la, la fòrta oposicion a l’iniciativa del deputat Aymeric Caron lo forcèt de retirar la proposicion qu’aviá presentat. Caron es del partit Revolucion Ecologica pel Viu (REV) integrat dins La França Insomesa de Jean-Luc Mélenchon
 
La proposicion de Caron a subit una granda oposicion, quitament demest los membres de son grop parlamentari. Lo deputat se vegèt dijòus forçat de la retirar après recebre mai d’800 emendaments al tèxt, qu’avián per tòca d’empachar sa discussion parlamentària. “Devi afrontar los faches, uèi poirem pas abolir la tauromàquia”, çò diguèt Caron que, totun, “prometèt” que “la corrida seriá lèu abolida”.
 
Caron es un famós defensor dels dreches dels animals, e un dels mai famoses d’aquela tendéncia dins l’esquèrra francesa, e la proposicion de metre lo ponch final a la corsa de braus espanhòla se rebatiá ja dins son programa electoral. Lo tèxt de la proposicion de lei criticava amb duretat que la tauromaquia foguèsse considerada coma un art. A mai, remembrèt que la lei contra lo maltractament animal establís quitament 5 ans de preson e una sancion de 75 000 èuros en cas de la mòrt de l’animal. “Qui pòt dobtar que lo tractament infligit a un taur pendent una corrida intra pas dins aquesta categoria?”, çò se demandava Caron.
 
La proposicion de lei retirada explicava tanben l’origina espanhòla de la corrida. “Arribèt solament en França en 1853, per complaire a Eugénie de Montijo, esposa andalosa de Napoleon III. E beneficièt solament d’una excepcion a las sancions previstas pels faches de crudelitat en 1951”, çò explicava en tot apondre qu’aquela sòrta d’espectacle gaudís de fonzes europèus a partir de la politica agricòla comuna (PAC) e de las subvencions localas.
 
De manifestacions en favor e contra la proposicion de Caron se son tengudas un pauc pertot. L’afar a portat la division quitament al sen de l’esquèrra.
 
L’abolicion que la reclama Caron implicariá la modificacion del còde penal, concretament l’article 521-1. Aquela nòrma enebís los actes de crudelitat contra los animals, mas a coma excepcion la corrida perque la considèra coma una tradicion locala ininterrompuda.


 
 
 


abonar los amics de Jornalet

 



 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Pascau
8.

#6 Que'm sembla qu'avetz descriut pro plan l'estrategia deus antispecistas abolicionista : abordar los subjctes los mei consensuaus de l'espleitacion animala (corrida e caça practicats e defenuts per ua minoritat e regitats per la majoritat) qu'ei un but en se mes que serveish tanben a sensibilsar aquesta majoritat a las tematicas de l'espleitacion animala mei generalament, tot aquò dens lo but d'abolir las fòrmas d'espleitacion animalas non-necessàrias dens un aviéner luenhèc.

E qu'avetz tanben identificat lo lor argument centrau : los animaus que son sentients.

Per contra, n'avetz pas avançat de contra-argument, si?

  • 2
  • 0
LECLERCQ Joan-Marc
7.

#6 Aquò que hè dejà 22 ans que mingi pas mès de bèstias. Es interessant de véser que, dens vòste tèxte, balhatz arguments contra l'espleitacion vergonhosa de la patida animala, mes après semblatz geinat peu hèit que s'agiré pas que de "ecologisme isteric e jet-set, pavlovianament repercutat per la bobotalh parisenca". Semblatz de la plan conéisher doncas aquesta.

La bobotalha parisenca se'n hica una hartèra de carn, s'aquò vos pòt rassegurar. Minjar carn es un ahar de rics ara. Per contra, los babas-cools desadinerats d'Arièja, eths, son meslèu vegans.

En resumit, es curiós de véser los dus nivèus d'escritura : arguments senats, puèi ataca contra los que son designats arbitràriament per vosautes coma los responsables deus arguments senats. "Es plan de minjar pas de bèstias, per la planèta, per las bèstias, per la santat, mes los que disen aquò (o los que jo designi coma los que disen aquò) m'agradan pas, doncas cau contunhar de poluar, hèr patir bèstias e se guastar la santat per lutar contra aqueste monde. Curiós.

  • 19
  • 20
Totes al Veganisme ! Santa Monica/Malibu/Passy
6.

#4 Aqueles arguments anti-corrida sagnoses e espaventoses (que òc, son plan reals ) son EXACTAMENT los mèsmas qu'usitan los adèptes del veganisme.
Vertat qu'un masèl mata-buòus, que siague industrial o pas, es idem qu'una arèna, mas multiplicada per millions e millions de vidas animalas drogadas puèi sagatadas. E parlem pas de las cirròsis provocadas a cò de las aucas per produsir lo fètge gras.
En clar sètz madurs pel veganisme. Aquò tomba plan ! Qu'aprèp la mesa fòra-lei de las corridas puèi logicament l'interdiccion totala de la caça, del fètge gras, de la carnsalada, dels tripons e patin cofin, la tòca venenta isterica d'aquel ecologisme jet-set, pavlovianament repercutat per la bobotalha parisenca, serà de nos impausar lo veganisme. Amb EXACTAMENT los mèsmas arguments qu'usitan uèi contra la corrida.
Corrida que personalament es pas pus ma tassa de tè que lo foot, la caça, la play-station o lo tiercé, mas es uèi urgentissim de frenar la deriva autoritarista e dictatoriala qu'en tota bona pensança poja de mai en mai dins lo discors d'aquel ecologisme de salon, moralisator e culpabilisaire, que fai ofici de faire-valer al neo-liberalisme triomfant.

  • 23
  • 16
Pitaluga
5.

#4
Car Joan-Marc, avètz oblidat de precisar, e solide qu'o sabètz, qu'en mai de las drògas, lo taur a las banas limadas per li complicar los còps.
Quant a çò de la bobotalha, cal reconéisser que de còps que i a los mai nècis an qualques luses. Pròva que cal pas desesperar.

  • 19
  • 12
LECLERCQ Joan-Marc
4.

#1 Doncas, segon vosautes, gostar pas lo hèit qu'una paura bèstia (drogada, aquò se ditz pas mes ara es coneishut) posca estar picada au sang dinc a n'escupir per la boca abans d'estar escanada per una espada, es estar un "bobo parisenc que vòu impausar una vision americana de la societat" ? Seriós ?
E benlèu vos enganatz. Benlèu lo monde a evoluit e los espectacles sagnoses agradan pas tan qu'abans. I auré doncas pas que los borgeses parisencs qu'aurén una consciéncia ?
Personalament, la violéncia m'agrada pas, mes passi tot mon temps a'm pelejar damb los que'ns volen o que's deishen americanizar. Doncas, fonciona pas.

  • 24
  • 18

Escriu un comentari sus aqueste article