Era restauracion aranesa se destaque enguan enes distincions dera Guida Michelin des estats espanhòu e portugués 2023. Dus restaurants de Bossòst (Quate Lòcs), Er Occitan e El Portalet, an obtengut era mès grana reconeishença gastronomica. Ath delà, eth Mont Bar de Barcelona, dirigit per aranés Iván Castro, obten era sua estela Michelin quauqui dies dempús qu’eth sòn codinèr en cap, Fran Agudo, ei estat nomentat melhor codinèr der an 2022 peth Forum Gastronomic de Barcelona.
 
Castro ei originari deth pòble de Mont (Marcatosa) e proven d’ua familha de restauradors de Vielha. Eth Mont Bar, en Barcelona, a creat eth concèpte de bar de nauta gastronomia damb productes de prumèra qualitat, fòrça d’eri originaris des uarts aranesi.
 
Quant as restaurants de Bossòst, era Guida Michelin soslinhe qu’Er Occitan prepause modernitat “en tot combinar productes deth parçan e dera sason damb sabors asiatics e indians”, e qu’El Portalet “demòstre bones idèes e amasse tecnica e creativitat”.
 
Era Guida Michelin a diuerses edicions estataus en mon entièr. Ei ua seguida de libres publicadi, des quaus era guida vermelha ei era mès anciana e coneishuda des guides d’ostalaries e de restaurants d’Euròpa, qu’autrege es prestigioses esteles.