capçalera campanha

Actualitats

Internacional

S’espandisson en China las protèstas contra las estrictas politicas anticovid. Que revendican?

| Koki Kataoka/AP/AAP

Tèxte legit

En seguida de las insolitas manifestacions en China contra las estrictas politicas anticovid, publicam una adaptacion a l’occitan de l’analisi que David S. G. Goodman fa dins The Conversation. David S. G. Goodman es director del Centre d’Estudis de China e professor de politica chinesa a l’Universitat de Sidney.


Las protèstas en China de la dimenjada passada contra las politicas anticovid del govèrn an fach la una dels jornals del Mond entièr, en seguida d’un incendi mortal dins un apartament a Ürümqui (Xinjiang) que tuèt dètz personas.
 
Fòrça internautas an afirmat que de residents se podián pas escapar perque l’immòble èra parcialament verrolhat, malgrat que las autoritats ajan desmentit aquelas afirmacions.
 
Segon qualques informacions, de manifestants aurián reclamat la demission del president Xi Jinping, reelegit fa gaire secretari general del partit comunista chinés. D’autres an quitament criticat lo partit.
 
Las mesuras anticovid de China son de las mai estrictas al Mond, perque lo país es totjorn a confinar per suprimir lo virus — çò que se nomena politica de “covid dinamica zèro".
 
Aquelas manifestacions son, probablament, de serioses desfises a l’autoritat, mas devon èsser relativizadas. En particular, se pòt pas far un parallelisme vertadièr amb las de la plaça Tiananmen en 1989. Son de manifestacions per carrièras ont los manifestants se dispèrsan après aver marchat e protestat, e la tòca principala de las protèstas son las restriccions anticovid puslèu que de principis politics mai largs.
 
Lo principal problèma aicí es la frustracion non solament envèrs las restriccions contra la covid, mas las incoeréncias d’aquelas mesuras.
 
Almens a tèrme cort, las reaccions de l’estat seràn probablament moderadas. I a, sens cap de dobte, una pression pel cambiament, e mai siá de mal preveire cossí aquò serà realizat.
 
 
Una responsa mai nacionala
 
Las manifestacions en China son de fach vengudas pro correntas pendent los dos darrièrs decennis, mas gaireben totjorn se concentran sus de problèmas especifics e son fòrça localizadas.
 
Los salariats d’una usina pòdon protestar contra la manca de pagament o la deterioracion de las condicions. Los abitants d’un vilatge obligats de se reïnstallar per tornar adobar lors tèrras ensajan de resistir, de còps quitament refusan d’èsser desplaçats. Los abitants dels nòus lotejaments se mobilizan per plànher la manca d’estradas, de comèrcis e de servicis promeses.
 
Las protèstas d’aquela mena son generalament resolgudas d’un biais rapid e rasonable, mai que mai per de representants de l’estat qu’intervenon per garentir de solucions al nom del manten de l’estabilitat.
 
Mens capables d’una tala solucion instantanèa son las protèstas contra de principis mai generals, coma la libertat d’expression, la representacion legala o las responsabilitats governamentalas. En aqueles cases, las responsas del governament an agut tendéncia a estofar las inquietuds.
 
Mas aquelas protèstas son gaireben totjorn estadas localizadas e an pas creat cap de movement regional o nacional. Es quitament estat lo cas dels conflictes del trabalh ont los salariats an protestat dins una o mai d’una usina d’una societat o d’un sol proprietari.
 
Non i a pas cap d’evidéncia, per ara, que nos faga pensar que s’agís d’un movement nacional organizat. Mas sembla que los manifestants de cada vila sián encoratjats per las accions dels manifestants de las autras.
 
En legissent los rets socials chineses, es clar, per exemple, que los manifestants de Pequin e de Shanghai rendon compte los unes de las manifestacions dels autres, aital coma de comentaris sus las originas de las manifestacions a Ürümqui.
 
A l’ora d’ara, las reaccions de la polícia son diferentas d’un endrech a l’autre. Cèrts policièrs aurián autorizat la seguida de las manifestacions. Mas en d’autres endreches, s’es raportat de petitas batèstas e qualques arrestacions.
 
Fòra de las carrièras e luènh dels manifestants, los abitants asimptomatics dels immòbles en confinament an, de còps, contunhat de manifestar.
 
 
Revendicacions dels estudiants
 
Una quarantena d’estudiants de la principala universitat de Pequin publiquèron dimenge una declaracion que criticava “lo començament de la politica de la dinamica zèro”. Declarèron que las politicas de covid zèro provocavan un nombre creissent de problèmas e qu’avián menat a de “tragèdias òrras”, e mai se reconeguèsse l’importància e l’eficacitat de las mesuras de seguretat començadas mai d’ora pendent la pandemia.
 
Declarèron tanplan que “lo prètzfach mai urgent d’ara èra de trobar un mejan temporari de coexisténcia que minimizèsse lo dangièr de l’epidemia en garentissent l’òrdre social basic e los besonhs economics e de subsisténcia de basa".
 
 
Per aquela tòca, prepausan cinc mesuras clau:
 
1. “Per evitar los abuses del poder public, totes los blocatges de quarantena regionals devon èsser arrestats per garentir que totas las personas de las comunautats, dels vilatges, de las unitats e de las escòlas pòscan intrar e sortir liurament"
 
2. “Abolir los mejans tecnics per susvelhar los anars venirs dels ciutadans, tals coma los còdes d’accès e l’aplicacion de seguiment dels telefòns mobils [còde de santat]. Quitar de considerar la propagacion de l’epidemia coma la responsabilitat de qualques individús o d’institucions. Consagrar de ressorsas a d’òbras de tèrme long coma lo desvolopament de vaccins, de medicaments e la construccion d’espitals”
 
3. “Començar de tèstes [PCR] volontaris e una quarantena volontària per las personas non diagnosticadas e asimptomaticas”
 
4. “Liberalizar las restriccions a l’expression de l’opinion publica e permetre de suggestions e de criticas de problèmas especifics dins diferentas regions”
 
5. “Divulgar de donadas vertadièras de l’infeccion: lo nombre de personas infectadas, la taxa de mortalitat, la taxa de covid, per eliminar la panica epidemica pendent la transicion”.
 
Las questions clau son de saber cossí passar de l’actuala politica de “covid dinamica zèro” a quicòm mai, e de fach quin deuriá èsser aquel quicòm mai, vista la cobertura sanitària inadeqüada dins una bona partida del país.
 
 
 
David S G Goodman
director del Centre d’Estudis de China
professor de politica chinesa a l’Universitat de Sidney
Article publicat en anglés dins The Conversation.
 
 
 


abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article