En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas l’entrevista del cantautor gascon Primaël Montgauzí que compausa e canta sas cançons en gascon, en francés, en francitan, en catalan e en arabi, en sòlo o en duo dins lo grop Noubalòtcha amb lo musician Chokri Trabelsi. Sas cançons se pòdon descobrir sus YouTube e Soundcloud o sus son blòg primaelmontgauzi.com.

Lo cantador Primaël Montgauzi, originari d’Aush, es installat en país de Rodés. Comencèt la musica de faiçon aboriva amb de primièras nòtas jogadas al piano a l’atge de cinc ans. Dempuèi alara es una caminada rica entre Occitània, la peninsula Iberica e l’America latina. Ongan, en mai d’un album nòu entitolat Languiment, a participat a una creacion en lengas dichas de França en cò de Francis Cabrel que li a valgut un passatge sus France 3 Nouvelle Aquitaine. Ràdio Occitània es anada al rescontre d’aquel artista singular dins lo païsatge musical occitan.