xUn jutge dels Estats Units a archivat l’enquista al prince saudian Muhammad Bin Salman per sa participacion a la planificacion de l’assassinat del jornalista Jamal Khashuqji (sovent transcrich Khashoggi). Lo jutge ditz que i a “d’incidis credibles” que lo prince Bin Salma i siá implicat, mas que l’enquista pòt pas contunhar a causa de la decision del govèrn de Joe Biden de li reconéisser l’immunitat per son ròtle de governant.
 
Khashuqji foguèt assassinat dins lo consolat saudian a Istambol en octòbre de 2018 per un comando qu’èra exprèssament partit del reialme arabi, pretendudament amb l’intencion de lo convéncer que tornèsse al país, perque viviá en exili als Estats Units. L’afar damatgèt fòrça l’imatge internacional de la monarquia saudiana, mai que mai del prince eiretièr Muhammad Bin Salman. L’ÒNU assegurèt qu’aviá de pròvas qu’implicarián lo prince.
 
En setembre de 2020, se jutgèt en Arabia Saudita cinc personas per aquel assassinat en las condemnant a 20 ans de preson. La nauta comissària de las Nacions Unidas per las execucions extrajudiciàrias, Agnes Callamard, qualifiquèt l’audiéncia de “parodia de justícia”. Mentretant en Turquia, an jutjat, en lor abséncia, una vintena de ciutadans saudians per aquel crime.