En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas l’entrevista del compositor, poèta e autor Gerard Zuchetto. Dempuèi 1985, Zuchetto canta los trobadors, los classics occitans e los poètas contemporanèus. Es tanben l’editor de Tròba Vox, lo labèl occitan independent qu’ajuda a l’espandiment de las creacions musicalas e poeticas. Aquesta setmana, conta a nòstres confraires de Ràdio Occitània las animacions que prepausa pel 16 de decembre venent a l’ocasion de l’anniversari de l’Ostal d’Occitània.

Coma cada an, la data del 16 de decembre es un moment especial pel mond de l’Ostal d’Occitània. Es l’anniversari del jorn que la comuna de Tolosa daissèt la clau de l’Ostal de Boisson-Etxeberri, ancian ostal del sègle XV possedit primièr per de rics mercands  originaris de Roergue. Es l’escasença a cada còp de tota una jornada d’animacions. Ongan viraràn a l’entorn de la tematica trobadorenca sus convidacion del Gerard Zuchetto. Avèm devisat amb el dels elements programats per aquela jornada.