— Eva Kailí foguèt vicepresidenta del Parlament Europèu fins a dimars. Se presentèt pel Movement Socialista Panellenic (PASOK), partit grèc d’ideologia socialdemocrata. La cambra l’a destituida per una larga majoritat: 625 vòtes en favor, un contra e doas abstencions.
 
— L’italian Francesco Giorgi es lo calinhaire d’Eva Kailí e assistent parlamentari al Parlament Europèu dempuèi 2009. Es lo cap del gabinet del president del Comitat dels Dreches Umans, un trabalh que li a permés d'aver una granda agenda de contactes de parlamentaris, politicians, institucions de l'Union Europèa, ONG e ambaissadas. Estudièt las sciéncias politicas a l'Universitat de Milan.
 
— L’italian Pier Antonio Panzeri foguèt deputat del Parlament Europèu de 2004 a 2019 amb lo grop de l’Aliança Progressista dels Socialistas e dels Democratas –lo meteis que Kailí. Segon lo jornal Knack, es lo cap del ret de corrupcion. En cò sieu, segon los mèdias locals, la polícia a trobat mièg milion d’èuros en liquid.
 
— Lo seisen interpelat es Niccolò Figà-Talamanca, secretari general de l’ONG No Peace Without Justice. Es doctor en drech internacional e a conselhat qualques govèrns e institucions sus la metodologia operativa d’institucions de justícia penala internacionala e mai suls procèsses de reddicion de comptes. 
 
— Dins l’encastre de l’enquista, fòrça agachan devèrs la presidenta del Parlament Europèu, Roberta Metsola, e son marit, Ukko Metsola, un famós lobbista de l'indústria de las crosièras qu’a de relacions amb divèrses païses arabis. La polemica sul ròtle d’Ukko Metsola durant los ans, en fach, a atench son esposa.