Tolosa aculhiguèt dissabte passat la Korrika, la marcha revendicativa per la lenga basca. Endavant!, lo collectiu que trabalha per desvolopar e socializar la lenga occitana dins la vida vidanta, menèt la marcha basca per las carrièras de la Ciutat Mondina.
 
La Korrika (“en corrent”) es una marcha revendicativa que se debana en corrent pel Bascoat e endacòm mai en favor de la lenga basca. Lo promotor de l’inciativa es l’associacion d’euskaltegis (escòlas de basco) AEK. La particularitat d’aquela marcha es que s’arrèsta pas per la nuèch. Dempuèi que sortís fins a la fin, la bandieròla passa de man en man, de vila en vila, de vilatge en vilatge, sens s’arrestar en cap de moment. La primièra Korrika se debanèt en 1980.
 
Al davant la marcha, i va normalament la persona que pòrta lo testimòni. Cada quilomètre de la marcha, lo pòrta una persona o associacion que “crompa los quilomètres” per ajudar economicament. Lo testimòni es fach amb un baston de fusta talhada, que se sèrva dempuèi la primièra edicion amb la bandièra basca.
 
La marcha se debana dins un grand ambient, amb de musica e d’animacions long de tot lo trajècte. Parallèlament, s’organiza divèrses actes culturals en favor de la lenga.