Aguesta dimenjada, eth Maraton de Votzes deth projècte “Araina, votzes en aranés” a amassat mès de 8 ores de votz enregistrades en aranés d’un centenat de participaires. Er eveniment, amiat a tèrme de manèra presenciau e virtuau, a compdat damb persones de diuèrses edats, registres e accents que s’an enregistrat en tot liéger enquia 4000 frases en aguesta varianta gascona dera lengua occitana.
 
Pendent eth maitin de dissabte, es prumères persones volontàries dèren era sua votz ara convocacion presenciau deth Maraton de Votzes qu’acuelhie eth Conselh Generau d’Aran en Vielha. Era cooperativa Col·lectivaT, que desvolòpe eth projècte, hec ua presentacion dera activitat e organizèc ua conferéncia de premsa entà explicar es tòques deth projècte damb es intervencions deth lingüista computacional Alp Öktem, dera cercaira Helena Torres e dera ensenhaira aranesa Maria José Fernández. Era rèsta de dimenjada, es persones volontàries contunhèren d’enregistrar era sua votz de manèra virtuau a trauès des sòns dispositius mobils e ordenadors.
 
Eth Maraton de Votzes a estat era activitat principau deth projècte Araina tà començar a crear eth prumèr còrpus de votz en aranés a compdar dera participacion collectiva, indispensable entà desvolopar tecnologies deth parlar. Dempús d’aguesta dimenjada, era web deth projècte se mantierà activa entà agranir eth còrpus e arténher pro d’enregistraments de votz en aranés; en cau aumens 100 ores entà poder crear es prumèrs prototipes de sistèmes deth parlar.
 
Entà enregistrar era sua votz, es persones participaires pòden entrar en web deth projècte, seguir es instruccions de foncionament e liéger en votz nauta diuèrsi fragments de tèxtes qu’apareishen projectadi ena sua pantalha. Es tèxtes introdusidi entà hèr er exercici son des òbres literàries classiques arrevirades per Antòni Nogués. Tot aguest procès d’arremassada de votzes se realize a trauès dera plataforma dubèrta Common Voice de Mozilla, coma se hè damb eth projècte Aina que ja pòrte mès de 2500 ores de votzes amassades en catalan.
 
Eth projècte Araina ei impulsat pera cooperativa Col·lectivaT damb era collaboracion des recercaires Jordi Suïls Subirà e Helena Torres Purroy, membres dera Universitat de Lhèida e deth Conselh Consultatiu der Aranés. Compde damb eth supòrt deth Congrès Permanent dera Lengua Occitana, deth Conselh Generau d’Aran e damb eth finançament deth Secretariat de Politica Lingüistica dera Generalitat de Catalonha.

 
 
 
PA/Red