La Cort Constitucionala d’Espanha acordèt diluns passat de paralisar l’examen d’una lei, ont èra previst de votar dos emendaments per modificar l’eleccion dels candidats al Conselh General del Poder Judiciari e reformar lo delicte de sedicion, del qual son acusats los elegits catalans per aver organizat lo referendum independentista d’octòbre de 2017. Los emendaments, aprovats pels deputats de la cambra bassa, devián èsser votats uèi al Senat.
 
En reaccion, lo primièr ministre, Pedro Sánchez, a dich que son govèrn prendriá “las mesuras necessàrias” per metre lo ponch final al blocatge dels jutges en n’acusant l’oposicion del Partit Popular. La data d’expiracion del Conselh General del Poder Judiciari a expirat dempuèi quatre annadas, e la manca d’acòrdi dels dos principals partits politics de l’estat a empachat d’elegir los jutges que lo devián renovelar.
 
Segon Sánchez, la decision dels jutges d’empachar l’examen d’una lei “a pas de precedents” ni en Espanha ni en Euròpa. Pasmens, los precedents pus clars son los nombroses còps que la Cort Constitucionala a entrepachat lo trabalh del Parlament de Catalonha, e justament a la demanda del partit socialista qu’ara se planh.