A la primièra pagina de l’ebdomadari La Semaine du Minervois d’aqueste dijòus 22 de decembre (n° 1169), un ridèu tancat e aquesta frasa: “Fermeture définitive??? (clavadura definitiva)”

Aprèp 25 ans de parucion, lo setmanièr La Semaine du Minervois arrèsta doncas sa parucion amb lo darrièr numèro de 2022. Pas aisit de prepausar una informacion alternativa, de trapar de publicitats, de se confrontar a las aumentacions multiplas (estampatge, distribucion,etc.), d’èsser pertocat per la pandemia,etc. L’apèl als dons e sostens, la campanha d’abonaments e una parucion cada 15 jorns solament en aquesta fin de 2022 foguèron de mesuras insufisentas.
 
La directritz de la publicacion explica: “Las cargas qu’arrèstan pas d’aumentar an fòrtament fragilizada la tresaurariá del jornal. Poirem pas suportar lo primièr trimèstre de 2023. Periòde generalament magrinèl ont las dintradas (publicitats, anóncias legalas) son mendres. Amb la partença de 3 salariats, nos es pas pus possible de foncionar. Lo depaus de bilanç es envisatjat per genièr. Esperam ça que la relançar una activitat dins los meses venents”.
 
Per ara, una votz per dire un territòri, dins son istòria e son actualitat, en presa dirècta amb las comunas e los estatjants, se cala.
 
Lo setmanièr a totjorn fait plaça a la lenga e la cultura d’Òc: cronicas “Papieròt menerbés”; cronica A taula!” (actualament: “Dins la sieta de Corbièras e Fenolhedés”); rubrica (en francés) de toponimia; paginas sus l’istòria de la contrada; atencion portada a las parucions (libres, discografia,…) e als espectacles occitans.
 
Lo jornal a totjorn dobèrt sas paginas e fait una larga plaça als moments de mobilizacions fòrtas per la lenga d’òc (manifestacions Anem Òc, manifestacions per la Lei Molac, etc. ). Fa dos meses, qualques paginas foguèron consacradas al bicentenari de la naissença del felibre Aquiles Mir. Se menèt batèsta per empachar la tenguda d’un concors de Miss Cathare!
 
L’editorial d’aqueste n° 1169 se clava sus aquestas frasas: “Tenètz-vos fièr·a·s! Que les temps à venir se teintent davantage d’humanité, de liberté, d’égalité, de fraternité, d’esprit critique et peut-être aussi d’un peu de légèreté… (Que los temps a venir se tinten de mai d’umanitat, de libertat, d’egalitat, de fraternitat, d’esperit critic e benlèu tanben d’un pauc de leugieretat).”
 
 
 
 
Alan Roch