capçalera campanha

Actualitats

InternacionalPolitica

Fusilhada a París: las victimas èran de militants curds

Segon Gérald Darmanin, s’agís d’un crime racista, revendicat per son autor. La comunautat curda a manifestat son indignacion per carrièras

Tèxte legit

Las victimas de la fusilhada que se tenguèt divendres passat abans miègjorn a París èran de militants curds, segon de fonts pròchas de l’enquista. Lo tragic bilanç es de tres personas mòrtas e quatre de nafradas, dont doas son en estat critic.
 
L’autor presumit de l’agression, que segon Libération revendica lo racisme de son crime, es un òme de ciutadanatge francés e annat de 69 ans, detengut per la polícia après tirar sus lo Centre Cultural Curd Ahmet Kaya, en Carrièra d’Enghien. La fusilhada afectèt tant lo centre cultural coma lo restaurant e la perrucariá qu’i cabon.
 
Lo ministre francés de l’Interior, Gérald Darmanin, se gandiguèt sul pic sus plaça, e atribuiguèt l’atemptat a de rasons racistas, çò qu’indignèt alara la comunautat curda.
 
Segon BFMTV, lo suspècte foguèt ja arrestat, après atacar, fa un an, un centre de migrants del 12n arredondiment de París. Foguèt alavetz mes en examen per l’exercici de violéncia armada de natura racista, e plaçat en detencion provisòria. Ne foguèt liberat fa qualques jorns. De per abans, çò precisa Libération dins lo meteis article mençonat çai sus, èra ja conegut de la justícia per de faches de violéncias e de pòrt d’armas en 2016 e 2017.
 
De son caire, la comunautat curda manifestèt per las carrièras de París per fin de mostrar son malèsser. Se vegèt quitament d’episòdis de tension e de susmautas.
 
 



abonar los amics de Jornalet

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Franc Bardòu
1.

Lo suspècte foguèt ja arrestat, puèi foguèt alavetz mes en examen per l’exercici de violéncia armada de natura racista, e plaçat en detencion provisòria. Ne foguèt liberat fa qualques jorns. Donc per abatre de gents qu'òm considèra de raça inferiora, passam qualques jorns en preison puèi podèm tornar començar ? Qué cal entendre a d'absurditats aital ? Que los ancians maselièrs nazis aurián degut causir de s'exiliar en França, e non pas, tant luènh, en America Latina ? Qu'es plan mai grèu per un ciutadan basc o còrse de tuar un prefètcte o un representant de l'estat (mai de 30 ans de preison per d'unes, e lor detencion non es pas encara acabada) que per un capbrord racista de flingar qui que siá per de rasons racistas insofriblas ni injustificablas de ges de biais ?

Bonjorn l'egalitat davant la lei…

  • 13
  • 5

Escriu un comentari sus aqueste article