Las Pussy Riot an publicat una cançon novèla que critica durament l'invasion russa d’Ucraïna e la manipòla informativa que dison que lo govèrn rus exercís sus sos conciutadans. La cançon es entitolada “Mamà, agaches pas la television” (Мама, не смотри телевизор), de paraulas atribuidas a un soldat rus capturat per Ucraïna que, dins una telefonada, disiá a sa maire que i aviá pas cap de nazi aquí, coma o li avián dich, e qu’agachèsse pas la television.
 
 “Los que s’opausan a Putin son encarcerats, empoisonats e assassinats”, çò denóncian dins un comunicat qu'acompanha la cançon. Lo grop, que combat dempuèi d'annadas la repression del govèrn de Putin tant en Russia coma l’exterior, demanda un boicòt de la crompa de gas e petròli rus, e l’enebicion de la venda d’armas e municions a Russia. A mai, vòlon tanben que se confisque los comptes bancaris e las proprietats de las autoritats russas e dels oligarcas a l’estrange, e que lor impausen de sancions personalas; a mai reclaman qu’un tribunal internacional jutge Vladimir Putin, los encargats de la propaganda russa, los oficials de l’armada e “totes los responsables del genocidi que lo patís la nacion ucraïnesa”.
 
Lo videoclip de la cançon mòstra d'images dels bombardaments d’Ucraïna, de Putin, de la mobilizacion de l’armada russa e de las protèstas contra la guèrra, en intercalant d’imatges d’una valisa d’ont giscla de sang. A la fin de la cançon mòstran un enregistrament d’un concèrt ont urinavan sus un retrach de Putin.