Es detengut l’èx-boxaire britanicoestatsunidenc Andrew Tate, vengut tota una personalitat coneguda sus Internet per sos nombroses vidèos en streaming cargats de messatges misogins, masclistas, racistas, omofòbs, antivaccins. L’estrimaire ultradrechista e son fraire, Tristan Tate, los arrestèt dijòus passat la polícia romanesa. Èran recercats per aver bastit un grop de crime organizat que forçava de femnas de fargar de material pornografic que puèi eles difusavan sus de plataformas de pagament coma Onlyfans, e per lo raubatòri de doas filhas que Tate violèt e esplechèt dins de vidèos pornografics.
 
Amb l’ajuda de dos ciutadans romaneses, tanben detenguts, l’organizacion enganava de femnas dels Estats Units e del Reialme Unit per las menar en Romania. Lor fasián creire que s’èran enamorats d’elas e que se volián maridar amb elas. Puèi, las menavan dins lo districte d’Ilfov, ont èran embarradas e patissián de violéncias fisicas e de coercicion mentala abans d’èsser esplechadas sexualament.
 
Amb la distribucion d’aquel material pornografic, los fraires Tate aurián obtengut d’enòrmas somas d’argent que lor an permés de crompar d’ostals, de veituras de luxe, de criptomonedas... en tot ne far ostentacion dins lors publicacions sus Internet.
 
 
Mespresar Greta Thunberg, la clau de l’arrestacion?
 
Andrew e Tristan an lo ciutadanatge britanic, mas s’èran installats en Romania. Los arrestèron dins la banlèga de Bucarèst. La Direccion d’Investigacion del Crime Organizat e del Terrorisme de Romania los localizèt gràcias a un vidèo sus Twitter ont Andrew Tate se trufava de l’activista climatica Greta Thunberg. Lo vidèo mostrava de boitas de pizza comandadas dins una populara cadena de pizzariás de Romania. Las boitas permetèron a la polícia de los situar precisament.
 
Al moment de l’arrestacion lor confisquèron d’armas, de sòus e d’articles de luxe.
 
Divendres de matin, tanlèu conéisser lor detencion, Greta Thunberg se garcèt de Tate amb una publicacion sus Twitter ont disiá: “Vaquí çò que t’arriba quand reciclas pas tas boitas de pizza”.


L’enquista aviá començat en abril passat

Pasmens, aquela istòria sorrisenta qu’a capvirat los rets e mai qualques quotidians es pas de tot en tot vertadièra. Contactada par CheckNews, la procuraira romanesa Bolla Ramona, encargada de l’enquista, desmentís ça que la formalament que la boita de pizza d’Andrew Tate a menat a sa detencion: “Es una informacion tras qu'amusanta mas aquò es pas vertat. Executèrem un mandat de perquisicion ièr mas la decision èra estada ja presa abans son messatge [amb la boita de pizza], puèi l'autorizèt un jutge.” La procuraira indica que cinc escorcolhs se tenguèron dijòus e que la polícia “s'assegurèt que los dos fraires [èran] en Romania abans d’agir. Utilizam totas menas d'informacions, coma las de sorsas publicas, mas son pas las solas emplegadas”.
 

this is what happens when you don’t recycle your pizza boxes

— Greta Thunberg (@GretaThunberg) December 30, 2022

Thank you for confirming via your email address that you have a small penis @GretaThunberg

The world was curious.

And I do agree you should get a life https://t.co/mHmiKHjDGHpic.twitter.com/SMisajQRcf

— Andrew Tate (@Cobratate) December 28, 2022

"Knock, Knock."
"Who's there?
"Climate Change." pic.twitter.com/4szD3tKZPu

— Ricky (@Ricky_Flores) December 29, 2022