Coneisserà pas l’an nòu gregorian dins nòstre Mond: dins sos 95 ans ven de morir lo papa dich emerit Beneset XVI, dins lo monastèri Mater Ecclesiae situat dins los jardins de l’estat pontifical de Vatican. Son títol de “papa emerit” l’aqueriguèt en 2013 quand, al mièg de l’estonament general, demissionèt del pontificat.
 
Que lo menèt a aquela retirada anticipada, jamai vista dempuèi de sègles dins l’istòria del catolicisme? La lassièra de l’edat? L’oposicion a sas opinions fermament conservatrises fàcia al marxisme, al liberalisme e a una “dictatura del relativisme” que la predisiá dins las societats occidentalas? Las vivas controvèrsias sus los abuses sexuals de menors que los cometèron de religioses, e qu’el auriá pas pro combatut? Las sospièchas de corrupcion al Vatican? De marridas relacions amb la Cúria que govèrna l’estat papal? Lo fach d’èsser pas un tan grand comunicator coma son predecessor Joan Pau IId, totun tan conservator coma el?
 
Es, totun, segur que daissèt una granda influéncia sus lo catolicisme de la fin del sègle XX. Nascut Joseph Ratzinger en Bavièra, professor universitari e teologian reconegut, autor de libres fòrça legits, foguèt d’en primièr un dels artisans del concili Vatican IId que volguèt modernizar la Glèisa, abans d’evoluir devèrs de posicions mai conservatrises que lo menèron, coma prefècte de la Congregacion de la Fe e braç drech teologic de Joan Pau IId, a combatre e far sancionar de prèires jutjats tròp progressistas, coma los de la Teologia de la Liberacion, populara en America latina.
 
Curiosament e paradoxalament, es precisament d’America latina que li venguèt coma successor un cardinal del ton mai progressista, l’argentin Jorge Bergoglio, ara lo papa Francés.