L’escàndol de corrupcion del Qatargate, qu’i son implicats l’Union Europèa, Marròc e Mauritània, poiriá aver un quatren cap: Panamà. Las autoritats grègas an demandat d’informacions a las autoritats d’aquel país centreamerican a prepaus d’eventuals transferiments d’argent devèrs de comptes bancaris de l’èx-vicepresidenta del Parlament Europèu, Eva Kailí, qu’ara es encarcerada preventivament en Belgica.
 
Lo responsable màger dins la lucha contra lo blanquiment de cabals, Charalampos Vourliotis, a fach una demanda urgenta a Panamà —país conegut coma paradís fiscal— per que detalhe se lo govèrn de Qatar a transferit l’equivalent d’unes vint milions d’èuros devèrs de comptes de la banca Bladex al nom de Kailí o de sa familha. Cal recordar que lo 9 de decembre, quora se revelèt l’escàndol, lo paire de l’èx-vicepresidenta foguèt arrestat al centre de Brussèlas quand ensajava de fugir cargat de sacas comolas d’argent. Kailí l'aviá avertit de l’operacion policièra, mas aguèt pas temps de s’escapar perque èra susvelhat.
 
Pauc après l’arrestacion de Kailí e de son companh, Francesco Giorgi —tanben encarcerat preventivament—, Vourliotis ordenèt de gelar totes los bens restacats a la familha de Kailí. De fach, las autoritats grègas lor an confiscat un terren de gaireben una ectara dins l’illa de Paros e lo compte bancari emplegat per crompar aquel terren.
 
L’avocat de Kailí, Michalis Dimitrakopoulos, a insistit sus l’innocéncia de sa clienta en afirmant que totas las informacions restacadas a Panamà son falsas.