Lo primièr de genièr d’aqueste novèl an, se tenguèt a Brasília la ceremònia d’investidura de Luiz Ignacio da Silva, dich Lula, coma president de Brasil. Serà lo tresen mandat de l’èx-sindicalista après dos mandats consecutius entre 2003 e 2010. Jair Bolsonaro, lo president sortent e rival de Lula a las darrièras eleccions presidencialas, a refusat de li transmetre l’eissarpa presidenciala, coma o establís lo protocòl. Mentre que sos partisans refusan de reconéisser sa desfacha, l’ultradrechista èra ja partit als Estats Units per èsser pas al país pendent la ceremònia.
 
Dins son parladís, Lula mandèt un messatge “d’espèr e reconstruccion” contra la “devastacion” de la politica de son predecessor. “Lo grand edifici de dreches, sobeiranetat e desvolopament que lo bastiguèt aquesta nacion es estat sistematicament defondut aquestas darrièras annadas”, çò apondèt, en allusion a las politicas de Bolsonaro. Prometèt que son govèrn consagrariá totes sos esfòrces a rebastir aquel edifici.
 
Parallèlament, Lula remembrèt son messatge de 2003. “Diguèri que la mission de ma vida seriá complida quand cada brasilièr e brasilièra poiriá manjar tres repaisses per jorn. Dever repetir aquel engatjament es uèi lo simptòma pus grèu de la devastacion impausada a aqueste país aquestes darrièrs ans”, çò planguèt.
 
La ceremònia, ont èran presents de desenas de milièrs de brasilièrs e de caps d’estat del Mond entièr, aviá començat amb una minuta de silenci, consagrada a l’encòp al papa emerit Beneset XVI, defuntat la velha,  e a Pelé, la legenda del fòtbol que nos quitèt dijòus de la setmana passada.