Un pòrtavotz d’Al Qaida del Magrèb Islamic (AQMI) a assegurat qu’a assassinat l’ostatge bordalés Philippe Verdon, sequestrat a la fin de 2011, “en responsa a l’intervencion francesa en Mali”. Ça que la, França a pas confirmat aquela mòrt. L’anonci de la decapitacion se debanèt dimars de ser mejançant una telefonada a l’Agéncia Nuakshut Informacion (ANI) de Mauritània. Una persona que se fasiá apelar Al Qairawani e que se presentèt coma pòrtavotz d’AQMI assegurèt que l’execucion de Verdon, que qualifiquèt d’“espion”, se debanèt lo 10 de març passat. Al Qairawani apondèt tanben que “lo president francés, François Hollande, es responsable de la vida dels autres ostatges franceses”.

Lo pòrtavotz del ministèri francés dels Afars Exteriors, Philippe Lalliot, reagiguèt sul pic per assegurar a l’AFP qu’aquela mòrt es pas confirmada. “Sèm a verificar e per ara sabèm pas res”, çò diguèt Lalliot. Del sieu costat, un representant de la familha assegurèt que i a pas res de confirmat. “Lo Ministèri nos a dich que prenèm aquela nòva amb fòrça resèrvas”, çò diguèt.
 
Phillippe Verdon foguèt sequestrat amb Sèrge Lazarevic, lo 24 de novembre de 2011, quand se trobavan dins una ostalariá d’Hombori, dins lo nòrd-èst de Mali, a 235 quilomètres de Gao. S’agissiá oficialament d’un viatge de negòcis, segon çò qu’anoncièron lors familhas. Ça que la, i a de dobtes sus la lor preséncia en Mali. Verdon, considerat coma una persona pròcha del mercenari Bob Denard, foguèt ja raubat en Sodan en 1991 e foguèt puèi acusat de fomentar un còp d’estat a las Comòras, e mai se fin finala las cargas contra el foguèron retiradas.
 
I a, a l’ora d’ara, quinze ostatges de ciutadaniá francesa en Africa, totes en mans de grops islamistas. Sèt d’eles se tròban supausadament en Mali: AQMI ne reten sièis, demest los quals i auriá Verdon e son companh Lazarevic, en mai de quatre trabalhadors de l’entrepresa Areva que foguèron capturats lo 16 de setembre de 2010 en Arlit (Nigèr). Lo seten e darrièr captiu es lo ciutadan francés d’origina portuguesa Gilberto Rodríguez, que, dempuèi lo 20 de novembre de 2012, es en mans del Movement per l’Unicitat del Jihad en Africa de l’Oèst (MUJAO). Los autres uèch raubats se tròban en Nigèria, e un d’eles, l’engenhaire Francis Collomp, es en mans del grop Ansaru e los autres sèt, tres adultes e quatre enfants de la meteissa familha, foguèron raubats per Boko Haram en Cameron lo 19 de febrièr passat.
 
L’evolucion de l’operacion militara en Mali, començada per l’armada francesa amb lo sosten de soldats de Chad, de la quita armada maliana e de qualques païses de la CEDEAO, fa témer per l’astrada d’aqueles ostatges. A l’ora d’ara, los soldats franceses e chadians combaton dins las regions de l’Adrar des Ifoghas, près de la frontièra amb Argeria, lo meteis luòc ont se poirián trobar los ostatges raubats en Mali.