Lo govèrn de Qatar prenguèt en carga las despensas de la vesita del primièr ministre del País de Galas, Mark Drakeford (Partit Laborista), e del ministre de l’economia, Vaughan Gething, pendent la Copa del Mond de fotbòl, coma a explicat lo quite govèrn interrogat per la BBC. La revelacion a emmaliciat l’oposicion e lo Partit Galés, que dona un supòrt parlamentari als laboristas.
 
Lo govèrn de Qatar s’encarguèt del lotjament, del manjar e del transpòrt de Drakeford e de sos acompanhaires. Un tractament, segon l’executiu, que recebèron d’autras delegacions estrangièras. Lo primièr ministre se lotgèt a la Ritz-Carlton d'Al Dawha, una ostalariá de cinc estelas.
 
Lo Partit Liberal Democrata, lo primièr que demandèt d’informacions oficialas sul viatge, a avertit qu'acceptar de prebendas de Qatar remet en causa l’engatjament de Galas per la defensa dels dreches umans. Totun, lo govèrn afirma que la vesita oficiala permetèt als ministres d’expausar lors valors e d’entamenar de convèrsas sul comèrci e sus d’investiments.
 
De fach, Amnestia Internacionala a profechat de la polemica per reclamar al govèrn que demòstre que Drakeford e Gething, dins lors reünions amb las autoritats qataritas, metèron sus la taula las violacions dels dreches umans.