A la rintrada, foguèt presa la decision de faire correspondéncia entre las doas calandretas de la vila de Carcassona. L’idèa es nascuda que las doas escòlas van trabalhar a l’entorn del sortir de la classa e de las passejadas. Per balhar de sens e l’enveja, voliam permetre als pichons de se retrobar ensems a caminar dins lo campèstre carcassonenc. La correspondéncia es un temps fòrt de la pedagogia institucionala que permet als mainatges de balhar de sens al grafisme, la reconneissença visuala, l’art, la dobertura sul Mond e suls autres. Vaicí l’article del padlet de la mairala de Puèg Marin.

La correspondéncia

Aqueste matin, al canton, escriguèrem la responsa a la letra mandada pels mainatges de la Barbacana. Puèi se calguèt investir dins l'espaci d’escritura. Los bèlses ajudavan los pichonets. D'aquel temps, dins la classa dels pichons, d'autres pintravan lo fons amb un polit jaune e tanben de rotge. Lo tantòst, d'illustracions foguèron coloradas e decopadas. Abans d'èsser pegadas per ornar la letra. Raquèl faguèt lo portaire divendres de ser. Los correspondents seràn contents de legir la nòstra responsa diluns e d'aprene que l'endeman passarem la matinada totes amassa!

La classa de mairala de Puèg Marin

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…