capçalera campanha

Actualitats

EconomiaPoliticaSocietat

França anóncia una reforma de las pensions que recuola l’edat de retirada a 64 ans

Los sindicats an cridat a una cauma interprofessionala lo 19 de genièr

Tèxte legit

Lo president francés e son govèrn vòlon revisar lo sistèma de las pensions. Dins un plan presentat per la primièra ministra Élisabeth Borne, l’edat minimala per la retirada s’establiriá a 64 ans en 2030, çò que per Borne es “una causida essenciala per aparar lo modèl social e manténer la solidaritat entre las diferentas generacions”. Se prevei que la mesura serà adoptada pel conselh dels ministres lo 23 de genièr amb la volontat que las proceduras parlamentàrias comencen en febrièr.
 
Los sindicats an convocat sul pic de mobilizacions lo 19 de genièr que ven. Qualifican la reforma d’injusta e declararan que caldriá aumentar los escotissons patronals, una opcion que l’escarta lo govèn de Borne.
 
Las organizacions patronalas an elas manifestat rapidament lor sosten a la reforma.
 
La proposicion presentada per Borne establís que l’edat minimala legala per se retirar, qu’es ara de 62 ans, siá de 64 en 2030 amb una evolucion progressiva pendent las sèt annadas venentas. A mai, a partir de 2027, caldrà aver cotizat 43 ans per aver una pension de retirada completa. Aquela mesura, qu’èra ja prevista per 2035, s’avança doncas de 8 ans.
 
Se considèra, ça que la, la possibilitat qu’ajan drech a la retirada anticipada entre 58 e 62 ans las personas qu’an començat de trabalhar e cotizar abans lors 20 ans, e una pension de retirada minimala de 1200 èuros.
 
Lo govèrn francés aviá quitament estudiat la possibilitat d’establir l’edat minimala de retirada a 65 ans, mas l’a rebaissada per facilitar un acòrdi parlamentari amb lo partit de drecha Los Republicans.
 
 
Lo 19 de genièr, cauma interprofessionala
 
Los principals sindicats an reagit lèu-lèu. Tanlèu que Borne aguèt fach son anóncia dimarts de ser, cridèron a una jornada de cauma interprofessionala e de manifestacions pel 19 de genièr que ven. A mai, avertisson qu’aquò serà pas “que lo començament” de las mesuras de fòrça decididas pels sindicats amb la tòca que la reforma prevista “intre pas en vigor”.
 
De sindicats coma la CFDT, l’UNSA e la CGT repròchan que lo govèrn de Borne aja pas pas brica escotat lors proposicions.
 
 
 
 

 
 


abonar los amics de Jornalet

 


 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Farda lorda
11.

#10

Non pensi pas coma lo govèrn ! Los teni de velhat pas mai !

Soi per un sistèm mai just. D’un autre band, dempuèi que sèm dintratz dins europa lo nivelament en tot se fa per lo debàs e segurament pas per lo naut. Caliá i èsser pas tot en se pensent que se fariá per lo denaut. Segur es pas un progrès.

La majoritat dels país d’europa son a 65 ans, pensi qu’i escaparèm pas. Mas la question interessenta es perdequé los autres país son a 65 ans e mai ; França a totjorn volgut inventar la podra, òc ben avèm 3000 milhards de deutes sul l’esquina, una brava podrièra çaquelà.
Se rementar que lo Deute son los impaus de doman. Me sembla que los govèrns dempuèi 40 ans an estat mai que mascanhas.

Bona manifestacion alavetz e fasetz atencion a vos. Per iò los jòcs son fach fa mai de detz ans que soi retirat.

  • 1
  • 0
Loïson Ispora
10.

#9 Que vei que pensatz vos tanben (com lo govèrn) qu'ua hrèita d'informacion e seré l'encausa de l'oposicion majoritària ad aquesta reforma de la retirada. Totun ne tiraratz pas deu cap deu monde que nivelar peu baish n'ei pas un progrès. Per çò qui ei deu finançament de las retrèitas peus actius qu'ei com la solidaritat deus plan portants de cap aus malauts arrés n'ei contra. Taus autes sistèmas, sonque de véder çò qui vadón las pensions aus Estats-Units arron la crisi de 2008, qu'arhedoleish.
De mei la vòsta demonstracion que passarà enquèra mensh se l'ahortitz de shifras fantasticas sortidas d'enlòc.
Fin finala s'ac compreni plan n'anaratz pas manifestar lo19 de genèr.

  • 3
  • 0
Farda lorda
9.

#8

I a en mai del regim de basa l’ARRCO + AGIRC que son retratas complementaris amb’un foncionament per punts e cada an la valor del punt es mesa al gost del jorn.

Puèi i a los regims especials ambe grandas anomalias.

Ja dins lo regim de basa i a desvarianças grandas per lo chiframent de la retirada

Sariá benlèu temps de tot desplegar puèi de fargar quicòm de mai just.

Per l’ora s’agacham la mejana europenca sus l’edat de retirada e lo nombre d’annuitats es un remirable mescladís.
La tendencia es 65 ans ambe 41-43 annadas. Cossi i podèm escapar sens demesiment del nivel de las pensions ?
Voldriái apondre que ja lo sistèm de basa en mai d’èsser injust es un vertadièr sistèm de ponzi a saber que l’argent que t’es retengut es pas per tu mas per pagar la retirada dels que son retirats.
Un autre punt es pels fonccionaris qu’es lo privat que finança a nautor de 37,8 Milhards. De per lor escotisson se pagan sonque un quart de lor retirada, lo demai es per tot lo mond.

de segur tot aquò es de siegre .

  • 1
  • 0
Loïson Ispora
8.

#7 Solide, qu'ei ua ajuda entà aver ua vista sus la soa retrèita personau per aquò la missa n'ei pas dita e los rendetz-ve sociaus a viéner ac pòden enquèra tot cambiar.

  • 3
  • 0
Farda lorda
7.

D' apleches de calcul pàrisson sul mercat per aver una idèia de l’edat ont poiretz prener la retirada e ambe qu’una pension(pension de basa). La presa de retirada es totjorn jos l’aflat de l’edat e lo nombre d’annuitats d’escotisson , per se retirar a taus plen caldrà agantar las dos termièras.

https://www.info-retraite.fr/portail-info/home.html

https://la-reforme-des-retraites-et-moi.fr/

https://nosretraites-simulateur-cas-types.netlify.app/

https://www.la-retraite-en-clair.fr/depart-retraite-age-montant/calculer-retraite/calculer-ma-retraite


  • 1
  • 0

Escriu un comentari sus aqueste article