Un dels detenguts per l’assaut contra los sits del poder democratic de Brasil a declarat davant la polícia que qualques membres de las fòrças armadas ensagèron d’ajudar los manifestants bolsonaristas a s’escapar dels edificis sens èsser arrestats, çò rapòrta l’agéncia Europa Press.
 
Es lo testimoniatge d’un dels atacaires del palais presidencial de Planalto. A declarat a la polícia qu’arribèt de l’estat de Santa Catarina amb una cinquantena de personas per fin de “protestar contra la corrupcion dins lo país e la manca de transparéncia dins los procèsses electorals”. A mai, a precisat que li calguèt pas pagar lo viatge perque aqueste s’èra cobèrt “amb de donas realizadas pel pòble”.
 
En çò que tanh a l’ataca del palais, a precisat qu’un comandant de l’armada los invitèt a fugir per una sortida d’emergéncia abans l’arribada de la polícia militara, qu’arrestèt de desenas de personas.
 
Lo quite comandant a dich qu’el s’interpausèt entre los policièrs antisusmautas e los manifestants per evitar “que la bastissa patiguèsse mai de damatges e que degun foguèsse nafrat”. A mai, a dich que tant l’òme qu’a testimoniat coma d’autres atacaires s’agenolhèron quand arribèt la polícia, e demandèron proteccion a l’armada mentre que cantavan l’imne brasilièr.
 
De lor caire, las fòrças armadas an indicat que per ara i a pas d’indicis que pòscan confirmar la version d’aquela persona.