Lo burèu del parlament de Catalonha s’amassèt en Aran dimècres passat a la sedença del govèrn del Conselh General, per demostrar “l’engatjament” del parlament pel territòri, segon sa primièra vicepresidenta, Alba Vergés. La sindica d’Aran, Maria Vergés, aprofechèt l’escasença istorica per reclamar un debat parlamentari per modificar la Lei 8/2022 sus l’usatge e l’aprendissatge de las lengas oficialas dins l’educacion en Catalonha e Aran. Es, per tant, probable que lo debat se tenga dins la sesilha parlamentària venenta dels 24, 25 e 26 de genièr.
 
Lo 2 de novembre, la session extraordinària del Conselh General d’Aran o aviá demandat a l’unanimitat, e aital presentèt una iniciativa legislativa al Parlament de Catalonha per modificar aquela lei.
 
En julhet de 2022 passat, après l’aprobacion de la lei adès mençonada, lo govèrn aranés e los representants de las escòlas  del país occitan mostrèron lor indignacion en tot denonciar que la lei considerava pas l’aranés coma lenga veïculara; lo govèrn de la Generalitat respondèt que l’occitan d’Aran demorava plenament lenga veïculara de l’educacion.