Cada dissabte, gràcias a Clamenç Pech, presentam dins Jornalet un personatge istoric del país nòstre, extrach de la cronica de Ràdio Occitània ”L’occitan del jorn”, que se difusa de diluns a divendres dins l’encastre de l’emission “L’ora del tè” entre 17h e 18h.
 

De còps, los faits istorics son pas de bon establir quand la legenda pren un pauc tròp de plaça. Es especialament lo cas quand s’agís de parlar de la cristianizacion d’Occitània quand fasiá encara partida de l’empèri roman. Cèrtas legendas son de bon detectar se pensam a la de Sant Afrodisi a Besièrs… Un esperit racional pòt pas gaire admetre qu’una persona escapitada se pòsca passejar tranquillament en tenent son cap dins las mans. Per d’autres racontes, se cal contentar de corregir cèrtas cresenças mercés a l’abséncia de pròvas o alara las admetre… Es mai o mens lo cas a prepaus del martiri de sant Saturnin, primièr evesque de Tolosa. 
 
Èrem al sègle III. Segon lo tèxte de la Passion de Sant Saturnin (publicat un sègle e mièg mai tard), Saturnin foguèt acusat pels clergats pagans de far calar los oracles quand passava al ras del Capitòli. Foguèt doncas somat de sacrificar un buòu en l’onor de l’emperaire e solide que refusèt. La resulta: l’evesque es estacat a un dels buòus de sacrifici e l’animal emmaliciat l’auriá rebalat dempuèi lo Capitòli (un temple qu’èra situat sus l’actuala Plaça Esquiròl) duscas a la pòrta nòrd qu’èra sus l’emplaçament actual del Capitòli. Se ditz que lo buòu contunhèt sa corsa furiosa pel campèstre e daissèt lo còrs del paure Saturnin sus l’anciana rota de Caors venguda Carrièra del Taur.
 
L’òme foguèt sepelit a l’endret ont foguèt trobat, dins un ataüt de fusta e dins un valat pro prigond per evitar tota profanacion. Un monument e una glèisa foguèron edificats sens qu’òm ne poguèsse determinar l’emplaçament exacte. Pendent longtemps se pensèt que la dita glèisa èra tot simplament Nòstra Dòna del Taur mas los arqueològs i trobèron pas cap de vestigis paleocrestians segon çò que ne ditz Wikipedia.
 
Qué que ne siá, la glèisa del Taur venguèt un luòc de romavatge important. A tal punt que, dos sègles après los faits, calguèt transferir lo reliquiari dins una basilica situada un pauc mai luènh… la Basilica de Sant Sarnin, ara integrada al centre istoric de Tolosa. Lo sant es celebrat cada an lo 29 de novembre per una messa vesperala. Son darrièr successor en data, Guy de Kerimel, foguèt nommat archevesque pel papa Francés en 2021.”



Clamenç Pech