Dissabte que ven, 21 de genièr, los establiments de las escòlas Calandreta de Lengadòc dobriràn lors pòrtas en tot prepausar diferentas activitats coma de diaporamas, de filmes, d’obradors educatius e esportius, etc. Cada calandreta a son programa.
 
Serà l’escasença per cada associacion Calandreta de presentar son establiment, que siá una escòla, un collègi o un licèu, de far descobrir lo projècte Calandreta e sa pedagogia innovanta, e de rescontrar las familhas interessadas per marcar lors mainatges a Calandreta.
 
Las escòlas Calandreta, escampilhadas a travèrs de tota Occitània, son d’escòlas laïcas e associativas qu’an un contracte amb l’Estat, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. La relacion entre los professors e las familhas es fòrça estrecha, e los parents se pòdon engatjar dins lo projècte fins ont vòlon. De mai, cada Calandreta a una estrecha relacion amb son entorn immediat, e aital la coneissença de la realitat pròcha e l’engatjament dels escolans amb l’entorn son plan nauts.
 
Al nivèl nacional, actualament i a 3905 calandrons dins 65 escòlas, 4 collègis e un licèu. Per quant a Lengadòc, i a 1980 calandrons dins 24 escòlas primàrias, 2 collègis e un licèu.