Josèp Marqués Bersach, abitant de Canejan (Quate Lòcs), moric dissabte passat a causa d’un trèt accidentau d’un caçaire quan passejaue ena zòna de Hèisha Barrada. Auie 87 ans e ère un “montanhaire adret, afable” e “gran coneishedor des montanhes de Canejan e dera Val de Toran”, çò publique eth baile de Bossòst, Amador Marqués, en sòn compde Facebook.
 
Es pompièrs d’Aran e es agents der environament deth Conselh Generau d’Aran recebèren entàs 11h22 er avís deth tragic accident e i desplacèren un elicoptèr e ua dotacion d’agents de sauvetatge en montanha des Pompièrs d’Aran (GRM), çò arrepòrte un comunicat deth Conselh Generau d’Aran. Es Mòssos d’Esquadra, que tanben se desplacèren tath lòc, hèn era investigacion des hèts. Segons es prumères informacions, era tragèdia se produsic pendent ua batuda de singlars. Marqués passejaue per un camin quan ua bala perduda l’artenhec. Sigueren es quites caçaires qu’alertèren es servicis d’emergéncies.

 


 

Comunicat deth Conselh Generau d'Aran sus er accident de caça qu'a auut lòc aguest maitin en Canejan, a on ua persona a perdut era vida: https://t.co/Ct6BAhblnlpic.twitter.com/KSfDbb0MgA

— Conselh Generau d'Aran (@conselharan) January 14, 2023