L’èx-primièr ministre francés e èx-conselhièr municipal de Barcelona, Manuel Valls, auriá finançat amb dos milions d’èuros la campanha presidenciala de la primària socialista de l’an 2017 per mejan de la societat petrolièra Orion Oil, una societat sospechada d’èsser al còr d’un vast sistèma de destornament de fonzes publics al profièch del clan del president congolés Denis Sassou-Nguesso. O desvela una enquista de Libération, que plaça l’èx-elegit al mitan del ret de corrupcion.
 
L’enquista se centra sus qualques pròches de Valls, qu’aurián abordat lo president d’Orion Oil, Lucien Ebata, en vista d'un finançament oculte de sa campanha naissenta per la presidenciala de 2017. Mentre que lo politician se preparava per çò que pensava d’èsser un combat politic determinant, la primària del Partit socialista que se joguèt entre Valls e Benoît Hamon, sorgiguèt dins las convèrsas telefonicas de Lucien Ebata, mes sus escota: “Es jove. E mai se perdiá, i auriá una relacion amistosa entre nosautres dos, seriá un amic novèl per ieu”, çò considerava alara Ebata.
 
Libération explica que l’afar d’Orion Oil remonta a 2012, quand la polícia detenguèt Ebata a París per aver una gròssa soma d’argent en liquid. A aquel moment, la doana francesa entamenèt una enquista sus Orion Oil, que se considèra que malversèt de fonzes publics al benefici del president del Còngo Denis Sassou-Nguesso. L’enquista senhala que s'emplegava la societat per pagar tota sòrta de despensas, dont la campanha de Valls.
 
 
Es pas la primièra irregularitat
 
L’afar que lo publica Libération es una pagina negra de mai de la carrièra de Valls. En novembre passat, se faguèt venir public que la campanha electorala de Valls a la comuna de Barcelona èra estada tanben irregulara; sa formacion politica foguèt sancionada d’una emenda per aver despensat mai d’argent que çò permés per la campanha electorala, e per aver mancat a la lei de finançament de partits politics en permetent que de tèrças personas n’assumiguèsson cèrtas despensas.

 

Valls aurait-il accepté 2 millions d'euros d'un homme d'affaires congolais mis en en examen pour "blanchiment et "corruption", pour financer sa campagne éclair à la présidentielle en 2017? https://t.co/asTX0ckVth

— Nils Wilcke (@paul_denton) January 12, 2023