D’avocats de Joe Biden an revelat que cinc paginas suplementàrias de documents classificats son estats descobèrts dins una residéncia privada del president dels Estats Units, aqueste còp dins l’estat de Delaware. Aquelas pèças transmesas al Ministèri de la Justícia datan tanben del periòde durant lo qual lo president actual èra vicepresident de Barack Obama (2009-2017), çò rapòrta Euronews.
 
Dempuèi la debuta de la setmana, l’Ostal Blanc tempta d’assuausar las causas:
 
“A restaurat l’independéncia del Ministèri de la Justícia. Es çò que nosautres fasèm aicí quand vos remandam cap al Ministèri de la Justícia. Restauram l’independéncia. Es important pel president e sèm coerents. Çò que disi a prepaus de las enquistas es coerent dempuèi dos ans. M’avètz ausit mai d’un còp, quand s’agís d’una question juridica o d’un afar coma aqueste, nos sèm totjorn referits al Ministèri de la Justícia. Donc i a pas res de diferent aicí.”, çò a declarat a la premsa la pòrtavotz del burèu del president, Karine Jean-Pierre. Aquela anóncia novèla s’inscriu dins una sèria de descobèrtas de dorsièrs confidencials retrobats dempuèi lo mes de novembre passat dins un burèu e de residéncias de Joe Biden. Demest los elements, i a d’informacions classificadas “Top Secret”. L’èx-president Donald Trump es el tanben dins la buta de la justícia per aver emportat de documents oficials dins sa residéncia de Florida.
 
L’Ostal Blanc vòl empedir tota analogia: los avocats de Joe Biden an “agit sul còp e volontàriament”, çò assegurèt Richard Sauber dissabte, mentre que Donald Trump es acusat d’aver dissimulat de dorsièrs, en grand nombre. La justícia estatsunidenca a nomenat un procuraire independent per enquistar sus aquel dorsièr. Tanlèu son mandat de vicepresident acabat, l’ensems de sos e-mails, letras e autres documents de trabalh aurián degut èsser transmeses als Archius Nacionals.