Un mes aprèp lo raubadís de la familha Fournier en Cameron, una segonda vidèo daus ostatges foguèt difusada per Boko Haram aquesta setmana. Las revendicacions son fermas: la sècta nigeriana vòu la liberacion de sos membres que foguèron arrestats en Cameron. Segon Le Monde dau 19 de març, l’Elisi vòu durcir sa politica de gestion daus ostatges e refusa de paiar las rançons “a de las organizacions contra las qualas sèm en guèrra”. Mas quau son los de Boko Haram e perqué son sovent associats a AQMI dins la premsa?

Boko Haram nais en Nigèria a la debuta daus ans 2000. D’aprèp son nom, Boko (“libre” en pidgin english) e Haram (“defendut” en arabi), l’objectiu de la sècta es de luchar contra, au sens estrech, l’ensenhament gastat dau libre sagrat, e dins son accepcion mai generala, la modernitat de l’Occident. Aqueu movement antioccidentau es pas pro originau en Nigèria. Dempuei los ans 1980, fòrça sèctas coma aquela se son desvolopadas dins lo país (Maitatsine per exemple). Mas la repression militara foguèt totjorn sagnosa e, fauta de finançament e d’efectiu, aquilhs movements manquèron tots.
 
Mas la subrevivença de Boko Haram a mai d’una causa.
 
Fau rapelar la situacion politica e economica de Nigèria. Emb una creissença economica de far pallir la Zòna Èuro (6,2% en 2012 d’aprèp l’EIU [Economic Intelligence Unit]), lo primier productor de petròli d’Africa es tanben l’unic país dau continent a presentar un deficit budgetari. Mai de la meitat de la populacion viu emb mens de 2 dolars per jorn. L’incapacitat de desvolopar los sectors industriau e de construccion, la part preponderanta de l’economia informala e la corrupcion agissenta fan venir l’economia e la politica ineficaças. Chau dire que Nigèria es au 121n reng, sus 180, au classament daus país corromputs segon Transparency International en 2011.
 
Dins un país que compta 20% de chaumatge e mai de 40% d’analfabetisme, las populacions desocupadas se viran vèrs las organizacions que las recrutan. L’Estat de creacion de Boko Haram, Bòrno, es un exemple màger d’aqueu fenomèn. La pauretat i es dos còps superiora a la mejana nacionala e l’educacion, quitament religiosa, i es abandonada. Qu’es aquí que cresquèt Muhammad Yusuf, lo creator de Boko Haram. Lo presicaire reclama l’instauracion de la sharia coma bèucòp d’autres, mas va tanben contra l’utilizacion mai politica que religiosa de la sharia. Per eu, las revendicacions islamistas son vengudas un mejan per accedir a l’elèit politic, lo mesme qu’oblida las populacions pauras un còp elegit. Yusuf refusa la participacion a las eleccions e introdusís un reget de la modernitat occidentala.
 
Los de Boko Haram començan lors assauts contra la seguretat dau país en 2003, e tuan de las desenas de personas en quauquas annadas. Lors fidèus son tanben sovent tuats o assassinats per lo poder, e l’afebliment de la sècta l’incita a cooperar emb la classa politica. Mas lo partit que sosten se torna virar contra Boko Haram un còp au poder e causa la mòrt de 15 de sos membres. Lo conflicte seguent vei la mòrt de Yusuf eu mesme e de mai de uech cents civils.
 
Dempuei, las accions de la sècta se fan ordinàrias, entre murtres de fòrças de l’òrdre e liberacions de criminaus. Lo raionament de Boko Haram es aura internacionau e las cellulas creisson. De las novèlas accions pareisson: atemptats contra los crestians nigerians e contra las organizacions internacionalas, presa d’ostatges per far liberar daus fidèus coma lo mes passat en Cameron.
 
La question que se pausa enquèra es la dau finançament de la sècta. Bèucòp parlan de liams emb AQMI. La vertat es que los de Boko Haram, coma AQMI, an mai d’una brancha e es malaisat de traçar totas las connexions. Las suspicions de finançament e d’armament semblan mai de se portar sus los partits politics e sus l’Estat nigerian eu mesme. Dins las darrieras annadas, Boko Haram mandèt de las atacas dificilament explicablas (dins las regions musulmanas o dins los barris paures que son totparier un sosten màger).
 
 
 
 
Cecila Hautefeuille