Lo mafiós mai recercat d’Itàlia, lo sicilian Matteo Messina Denaro, en fugida dempuèi 30 ans, es estat arrestat a Palèrme, en Sicília, çò anoncièt diluns lo viceprimièr ministre Matteo Salvini segon çò que rapòrta Euronews.
 
Èra un dels darrièrs caps mafioses màgers de Sicília. Matteo Messina Denaro, 60 ans, foguèt arrestat dins l’illa diluns pass.  Dirigent de la màfia Cosa Nostra, Es considerat coma lo successor dels “bosses” Toto Riina e Bernardo Provenzano, mòrts en preson en 2016 e 2017.
 
Segon lo general dels carabinièrs Pasquale Angelosanta, citat per l’agéncia de premsa AGIT, Matteo Denaro foguèt arrestat a l’interior d’una clinica privada, la Maddalena de Palerme. S’i èra gandit per de suènhs clinics.
 
Lo fugitiu, conegut jols chafres “u Siccu” (lo magre, en sicilian) o “Diabolik” en referéncia a una celèbra benda dessenhada italiana, es nascut dins la vila siciliana de Castelvetrano, e son paire, “Don Ciccio”, èra ja lo cap de la màfia de Trapani.
 
Ancian sicari (tuaire per d’argent) de Cosa Nostra, èra estat condemnat a la reclusion criminala a perpetuitat per murtres. Mas la sola fòto coneguda d’el remontava a la debuta dels ans 1990.
 
Es considerat coma lo cervèl dels atemptats que provoquèron la mòrt de dos magistrats antimàfia Paolo Borsellino e Giovani Falcone en 1992, e tanben son esposa e uèch membres de sa gàrdia raprochada.
 
 
Una perseguida de 30 ans
 
Dempuèi d’annadas, de centenas de policièrs e carabinièrs participavan a la traca del fugitiu mai conegut d’Itàlia. Dins sa vila, Castelvetrano, la polícia italiana multipliquèt las arrestacions e las sasidas de bens dempuèi los ans 2000. En tot, mai de 4 miliards d’èuros foguèron confiscats a sos pròches.
 
Aquela estrategia d’isolament durèt mai de 20 ans, tant son ret de sosten èra important, mas finiguèt que paguèt.
 
Son predecessor “Totò Riina”, de son vertadièr nom Salvatore Riina, dirigent del clan sicilian dels Corleonesi, foguèt arrestat lo 15 de genièr de 1993, exactament trenta ans abans.