Lo president del conselh executiu de Corsega, Gilles Simeoni, a patit aquestas darrièras setmanas una tièra d’incidents qu’an mes en alèrta la politica còrsa. Dins son discors de Cap d’An, Simeoni faguèt referéncia, d’un biais allusiu, a las menaças que recep. Aquò provoquèt un debat sus sa seguretat.
 
Pendent los darrièrs meses d’arunan, Simeoni patiguèt qualques incidents estranhs que poirián èsser a l’origina de las reflexions del cap de l’executiu insular. En novembre, se descobriguèt una bomba sens detonador dins lo restaurant L’Arôme, proprietat d’Hervé Valdrighi, un dels dirigents de Fà Populu Inseme (Far Pòble Ensems). Simeoni frequenta sovent aquel local.
 
Al començament de decembre, i aguèt dos incendis simultanèus. Un dins lo restaurant del filh de Simeoni, Le Bama, e un autre davant un concessionari de veituras a Sarrola-Carcopino, proprietat del conselhièr regional d’Aiacciu e amic de Simeoni Jean-André Miniconi. Aquel incendi cremèt sèt veituras. Dins los dos cases se desvistèt una forgoneta blanca.
 
Lo president de Corsega a pas cap de mena de proteccion oficiala. Las autoritats francesas li n’avián prepausada, mas el refusèt. Dins lo contèxt còrs, de veire lo president corsista de l’illa protegit per de policièrs franceses seriá incomprensibla pels ciutadans. Per aquela rason, lo parlament còrs a avançat la creacion d’un pichon grop de seguretat que deurà susvelhar, demest d’autras activitats, la vida vidanta del president.