A la mitat de son mandat, la direccion de la Federacion organizava aquesta dimenjada a Carcassona d’Estats Generals per una discussion dobèrta sus las perspectivas e los projèctes pel desvolopament del XIII e en vista de l’organizacion de las Copas del Mond en 2025. Onze taulas redondas se tenián per parlar de la gestion dels campionats e dels calendièrs; las mudacions; los licenciats joines (cossí gardar los U15, U17 e U19); las relacions clubs/comitats/ligas/Federacion; lo benevolat; las relacions de l’Elèit amb lor environament, etc.
 
Cal esperar las decisions que se prendràn e las concretizacions que se faràn.
 
 
Los Vinhairons de Ferrals reçaupràn Pià en ueiten de la Copa Lòrd Derby!
 
L’arribada de l’ivèrn e de la nèu menèt a l’anullacion de partidas previstas: l’Escura-Tonens en Copa Lòrd Derby; lo dèrbi Limós-Carcassona en Copa Nitard (U-19).
 
Proesa bèla dels Vinhairons de Ferrals (Nacionala) qu’eliminan la formacion d’Elèit 2: Selon de Provença (26-14). Atal, lo 18 o lo 19 de febrièr, reçaupràn en Corbièras la formacion catalana d’Elèit 1: Pià!
 
Vilagalhenc-Argon (Elèit 2) finís que s’impausa 16-11 a Palau (Nacionala) e reçauprà un club d’Elèit 1, Tolosa, en se sovenent que, fa qualques annadas, la formacion de Cabardés eliminèt St Gaudenç. Carpentràs va ganhar a Baó 26-18 e reçauprà Carcassona. Entraigas fa tombar lo primièr d’Elèit 2, Illa, 44-22, e reçauprà Lesinhan.
 
En Copa Nitard, sus la marca de 34-30, los joves de Lesinhan meton un tèrme a la longa tièra (un quarantenat) de partidas ganhadas en seguida pel XIII catalan!
 
 
Una jornada de campionat
 
Abans una novèla dimenjada de pausa per l’Elèit 1 en rason de la partida Dragons-seleccion francesa del dissabte 4 de febrièr a Brutus, son al programa d’aqueste dissabte 28 de genièr: St Gaudenç-Carcassona; Avinhon-Limós; Lesinhan-Tolosa; Vilanòva-Dragonets; Albi-Pià.
 
 
 
 
Alan Roch