En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, prepausam una entrevista de Domenge Salgon que la ràdio tolosana faguèt al començament de genièr. Salgon es quadre retirat de la SNCF e es engatjat amb Railcoop, la cooperativa carcinòla que restaura de camins de fèrre abandonats. En novembre de 2021, inaugurèt diluns la linha entre Tolosa e Capdenac e espèra de metre en servici lèu-lèu la linha ferroviària entre Bordèu e Lion. Aquí, per tal de concebre de servicis ferroviaris adaptats als territòris, la cooperativa carcinòla relançarà una autra linha de tren que l’aviá abandonada l’SNCF.

Lo tren demòra un mejan de transpòrt presat pels viatjaires puèi que representa encara lo 54% del transpòrt collectiu dins l’Exagòn. La fin del monopòli de la SNCF foguèt promulgada fa quatre ans e la concurréncia s’installa dapasset. Pasmens, se de grandas companhiás coma Trenitalia o la Deutsche Bahn fan ja circular lors veituras, de societats mai pichonas desiran d’investir lo malhum ferrat en cò nòstre. Demest aquestas i a la cooperativa ferroviària Railcoop dont lo sèti es installat a Fijac e qu’a per ambicion de far circular de trens entre Bordèu e Lion en utilizant las vias transversalas daissadas de caire per l’SNCF. Mas se lançar aital dins lo mercat del tren se fa pas sens dificultats… N’avèm parlat amb Domenge Salgon, quadre retirat de l’SNCF qu’es implicat dins aquela aventura.