Ràbia e indignacion als Estats Units pels imatges vidèo que mòstran cossí de policièrs tabasan un gojat negre fins a lo tuar. La victima li disián Tyre Nichols e aviá 29 ans. Lo murtre aguèt luòc lo 29 de genièr passat quand los agents arrestèron lo jovenòme per una supausada infraccion de circulacion automobila. Lo vidèo mòstra cinc agents, tanben afroamericans, que tustan lo jove amb una matraca e l’electrocutan amb una arma d’electrochòc. Nichols decediguèt tres jorns apuèi. Los cinc agents son acusats d’ominicidi.
 
I a agut de manifestacions contra las violéncias policièras dins divèrsas vilas, dont Chicago, Memphis e Nòva York, malgrat las temperaturas negativas.
 
Lo president Joe Biden a exprimit son dòl e son indignacion pel vidèo que mòstra la mòrt de Nichols. “Me soi sentit indignat e prigondament afectat quand ai vist l’òrre vidèo de la tabasada que causèt la mòrt de Nichols”, çò a comunicat.
 
Lo procès contra los cinc èx-policièrs arriba al mitan del debat social sus las violéncias policièras devèrs los afroamericans, particularament dempuèi lo murtre de George Floyd per de policièrs a Minneapòlis en mai de 2020, ont espeliguèt lo movement de protèsta conegut coma Black Lives Matter.