Una cinquantena de presonièrs de las Baumetas, a Marselha, protestèron dissabte contra lors condicions d’encarceracion. Los presonièrs refusèron de tornar dins lors cellulas. Intervenguèron las Còlas Regionalas d’Intervencion e de Seguretat (ÈRIS, segon la sigla en francés). Mai que que mai planhián lo freg dins las cellulas, la pauretat dels repaisses en carn e la preséncia d’abarrejadors de telefòns mobils.
 
La situacion, fin finala, se calmèt de ser. Lo personal penitenciari es refortit amb de material antisusmauta, uèch presonièrs son mandats en quartièr disciplinari e dos autres son estats transferits; lo temps de passejada es estat reduch per totes los presonièrs amb la tòca, o l’escampa, de reparar los degalhs dins lo segond pati.
 
Segon Cathy Forzi, del sindicat FO penitenciari, “es susprenent pr’amòr qu’ai Baumetas, globalament, lei causas son ben geridas e l’administracion es vertadierament a l’escota dei detenguts, mai après l’installacion deis abarrejadors, que son totjorn en cors de reglatge, manco nosautrei podèm pus trabalhar corrèctament”, çò ditz a La Provence.
 
De remembrar que, fa dètz ans, la preson de las Baumetas foguèt objècte d’un escàndol a causa de l'estat critic e insalubre del sit.
 
 
 

(https://t.co/q49rPcQ4Yf): #Marseille : trop peu de viande, froid dans les cellules... pourquoi ces détenus ont refusé de regagner leurs cellules : Une cinquantaine de détenus de la prison des #Baumettes de Marseille a protesté contre le.. https://t.co/4cdOZcFjAIpic.twitter.com/xce3DGmDmU

— Titrespresse.com (@titrespresse) January 30, 2023