Lo 15 de març passat, lo productor de David Guetta a anonciat que lo concèrt del ditgèi previst a Marselha, lo 23 de junh que ven al Pargue Borely, se debanarà fin finala al Dòma.

“David Guetta a pres coneissença de l’agitacion politica e mediatica a l’entorn del sieu concèrt”, çò ditz lo comunicat que remembra que lo contracte parla pas de cap de subvencion publica. La vila de Marselha prepausèt lo Pargue Borely e, dins aquela configuracion, se presentèt un budget per un concèrt de grand format. Pas un centim de la subvencion èra pels artistas mas per l’esquipament tecnic. E lo comunicat precisa la posicion del ditgèi parisenc: “en refusant de se veire dins un debat politic, e preocupat que cèrts marselheses se sentiscan greujats per una subvencion que lo tanhiá pas, Guetta nos demanda d’anullar aquel concèrt sens retard”.
 
La polemica se debanèt pr’amor d’una subvencion municipala de 400 000 èuros concedits a la societat privada Adam Produccion, per l’organizacion del concèrt pagant de 44 a 59 èuros.
 
La comuna de Marselha anoncièt “prene acte amb pentiment de la decision de David Guetta”, en notant que, “plan segur, la Vila de Marselha subvencionarà pas” aquel concèrt. E conclutz que “los opausants a la venguda de David Guetta dins la nòstra vila seràn sens dobte particularament aüroses d’aver privat los marselheses de tres, quitament quatre grands concèrts populars”. Es una referéncia als dos concèrts programats dins lo Pargue Borely: lo de David Guetta, que serà desplaçat, e lo de Mika, que se’n sap pas res.
 
“Per respècte per totes los sieus afeccionats”, lo ditgèi jogarà malgrat tot a Marselha aquela meteissa serada, al Dòma, a portanèls barrats, sens cap de subvencion”, çò insistiguèt lo representant de l’artista. Las bilhetas crompadas pel Pargue Borely demòran doncas validas per lo Dòma. Las personas que preferiscan se far remborsar las plaças o pòdon demandar.